Kapin 87 mil wa kadawat sa ilang cash gikan sa DSWD

CEBU, Philippines — Sobra 87,000 ka beneficiaries sa Unconditional Cash Transfer (UCT) program gikan sa Central Visayas ang wala maka-claim sa ilang cash grant karong tuiga.

Tungod niini, ang Department of Social Welfare and Development in Region 7 mihimo og laing schedule sa payout karong buwana aron ang tanan makadawat sa ilang cash grant.

Si DSWD-7 information officer Kerwin Macopia miingon nga adunay 87,067 beneficiaries ang gitinguha nila nga makakuha na sa ilang cash grant.

Siya nagkanayon nga ang uban wala makadawat tungod kay ang pangu o facilitator sa mga beneficiaries absent sa panahon nga nagpahigayon sa payout, kini kay layo ilang work location.

Ang uban usab niini kay mga social pensioners (o mga kabus nga senior citizens) nga naglubog na lamang ug maglisod sa pagbisita sa offsite payment. Pwede silang kuyogan sa ilang pamilya o paryente aron sila maka-claim sa ilang grant.

Matud niya nakadesider ang DSWD-7 nga mohimo og laing round sa payout sugod karong Nobiyembre 15 alang sa mga beneficiaries nga magdawatan pinaagi sa over the counter, kon sa mga gym o covered courts sa ilang lugar.

Kadtong wala pa makadawat maghuwat lang sa sunod nga schedule sa adlaw sa paghatag niini sa ilang mga lugar.

Si Macopia midason nga ang DSWD7 mikuha usab og mga “notifiers” nga mobisita ug mo-coordinate sa nagkalainlaing mga lokal nga pangagamhanan aron magmalinawon ang distribusyon.

Sa pagkakaron, ang DSWD-7 nakapagawas na og sobra sa P1.4 billion sa implementasyon niini karong tuiga sa UCT program.

Si Macopia miingon nga base sa October 31 nga datus, adunay 591,158 ka UCT beneficiaries ang nakadawat tagsa-tagsa sa ilang P2,400 cash grants: Ang 284,310 niini  Pantawid Pamilya beneficiaries; aduna usab mga 124,849 social pensioners ug may 181,999 ka “poor households” nga gibasehan sa latest nga household survey.

Kasagaran sa Pantawid Pamilya beneficiaries naggunit og cash cards samtang ang uban makakuha pinaagi sa over the counter. Matud ni Macopia, karong tuiga, ang matag usa ka beneficiary makadawat og P200 per month apan tingbon kining ihatag sa kantidad nga P2,400. (BANAT NEWS)