150 ka pump boat nagparehistro alang sa fluvial sa Birhen

CEBU, Philippines – Nagkadaiyang  sakyanan sa kadagatan ang gilaumang magpanon sa pagkuyog sa ipahigayong fluvial procession sa imahen sa Birhen sa Regla.

Kini gikatakda nga pagahimuon sa unang adlaw sa pagsugod sa nobenaryo sa iyang kapistahan isip patron sa Dakbayan sa Lapu-Lapu karong Nobiyembre 20 ug 21.

Ang fluvial procession ipahigayon sa Nobyimbre 12 nga mao usab ang unang gabii sa pagsugod sa novena.

Niabot na ngadto sa 150 ka pump boat ang nagparehistro nga mokuyog sa nahisgutang fluvial procession.

Ang buhatan sa City Tourism Commission sa maong dakbayan maoy gitahasan sa pagpangrehistro sa  mga mokuyog sa fluvial procession.

Gikatakda usab nga uban ang Metro Ferry Corporation, Armed Forces of the Philippines, Lapu-Lapu City Police Office nga mao usab ang gitahasan sa kahapsay ug kalinaw sa maong kalihukan.

Ang mga medical emergency team nga gilangkuban sa Pacific Cebu Resort Inc., Emergency Rescue Unit Foundation (ERUF), Philippine Red Cross ang magpundo usab diha sa lugar.

Ang mga sakyanan sa kadagatan nga mokuyog sa fluvial procession ang pagabutangan usab  og mga dayandayan nga naglakip sa mga lab-as nga mga buwak nga maghatag  unya og kamabulokon sa maong kalihukan sa kadagtan.

Manukad diha sa Suba Basbas ang  imahen sa Birhen sa Regla ug himuon ang pagdunggo  sa alas 8:00  sa buntag diha sa  Muelle Osmeña Wharf nga pagasugaton usab kini sa mga opisyal sa siyudad nga pangulohan ni Mayor  Paz   Radaza ug kanhi Kongeresista Arturo Radaza,  kaparian ug mga deboto nga mokuyog na paghatod sa imahen diha sa national  shrine ug sundan kini sa Santos nga Misa. (/BDB)(BANAT NEWS)