Pagbaligya og ilimnong makahubog i-regulate

CEBU, Philippines — Gihangop sa Mandaue City Police Office ang pagpalabang sa konseho sa siyudad sa ordinansa kabahin sa pag-regulate sa pagpamaligya sa ilimnong makahubog ug nakita nila nga dako kining tabang nga malikayan ang krimen sa siyudad.  Si Senior Superintendent Julian Entoma, direktor sa MCPO nagkanayon nga dako kining tabang sa kapolisan tungod kay aduna na silay magamit nga balaod.

Niadtong Oktubre 17 niining tuiga ang konseho sa siyudad nipalabang sa Ordinance No. 14-2018-1340 o “regulation of sale and consumption of alcoholic beverages” diin gidid-an ang mga 24-hour convenience store nga mobaligya og ilimnong makahubog gikan sa alas 12:00 sa tungang gabii hangtod alas 5:00 sa kadlawon.

Si Bise Mayor Carlo Fortuna ug Konsehal Nilo Seno ang mga nangamahan sa maong ordinansa.

Subay sa maong oridinansa nga ang mga persons-in-charge sa convenience stores gikinahanglan mobutang og signage nga makita sa mga kustomer niini nga dili sila mobaligya og  ilimnong makahubog subay sa orass nga naa sa ordinansa.

Gikataho nga ang mga hubog maoy daling makakita og away ug mahimong bayolente kini nga moresulta sa argumento ug pisikal.

Samtang ang ubang establisamento sama sa mga bar, pwede sila makabaligya og ilimnong makahubog apan kinahanglan nga anaa silay “license to sell” subay usab sa ordinansa. (/BDB)(BANATNEWS)