Petisyon sa dugang P2.50 sa pletihan giduso sa Manila
CEBU, Philippines — Aduna nay rekomendasyon ang Land Transportation Franchising and Regulatory Board-7 sa gipasaka nga petisyon nga P2.50 provisional farehike sa jeep sa Central Visayas.
Matud pa ni LTFRB-7 regional director Eduardo Montealto kagahapong adlawa nga iyaha nang gipadala sa ilang buhatan sa Manila ang iyang rekomendasyon apan nagdumili siya pagsulti kung pila ang kantidad.
"Forwarded na pero I cannot disclose yet how much is our recomnendation because Central Office has the final say," matud pa ni Montealto.
Ang minimum nga pletihan sa jeepney sa Central Visayas mahimong P9.00 kung ang LTFRB board members ug ang chairman moaprubar sa gipangayo nga P2.50 provisional fare hike petition nga gi file sa Basak-Lapulapu City Jeepney Operators and Drivers Association adtong usang buwan.
"Nanghinaot mi nga madali ang pag grant sa among petisyon aron pud kahatagan og dugang nga income ang among mga jeepney drivers nga pwerte na gyud nakapait sa ilang kahimtang," matud pa ni Romeo Armamento, usa ka jeepney operator ug usa sa mga board of directors sa BALACJODA.
Matud pa sa BALACJODA nga nipasaka sila sa maong petisyon tungod sa pagsige og saka sa presyo sa lana, sa spare parts, nagkataas nga inflation ug uban pa.
Apan ang militant transport group, Pinagkaisang Samahan ng mga Tsuper at Operators Nationwide-Cebu Chapter di uyon sa pagpasaka sa maong petisyon.
"Sugod pa lang sa sinugdanan, wala mi nisuporta anang pagpasaka sa pletehan sa jeepney kay dili kana maoy solusyon sa atong problema karon. Kung pasakaan ang pletehan, mosamot ang kalisud sa mga sumasakay," matud pa PISTON-Cebu chapter president Greg Perez.
Dugang pa ni Perez ang ilang gusto mao ang pagtangtang sa excise tax sa produktong petrolyo ug sa pagpahunong sa implimentasyon sa TRAIN Law.
"Kung wagtangon ang excise tax sa gasolina nga gipatuman ubos sa TRAIN law kay mokunhod ra usab ang presyo sa lana. Sa maong pamaagi dili na kinahanglan ang fare increase," asoy pa ni Perez.
Sa pagkakaron kay padayon nga P6.50 ang minimum nga pletehan sa jeepney sa Central Visayas. Ang pletehan sa mga estudyante, senior citizens ug persons with disabilities nagpabilin nga adunay 20 porsiyento nga diskwento sa jeepney's minimum fare. (/IBM)(BANATNEWS)
- Latest
