Sexual abuse sa kabataan nagpadayon
CEBU, Philippines — Nabalaka pag-ayo ang pundok sa Cebu Against Child Sex Tourism sa padayong pag-abusong sekswal sa kabataan diha sa pamilya, online, sa turismo ug trafficking.
Atol sa bag-ohay lang nahuman nga CAST 6th Annual Conference, gipadayag sa grupo nga bisan may nadakpan nga mga suspek sa cybersex ug mga turista, anaa gihapon ang maong problema nunot sa isyu sa kakuwang sa edukasyon, pagkabuak sa pamilya, pagkamausisahon sa kabatan-onan sa ginadiling drugas ug ginagmay nga krimen.
Namatikdan nga bisan ang mga bata pa kaayo nga kababayen-an ang nagkuyog-kuyog na og mga langyawng turista sa mga malls ug resorts imbis nga tua sila sa tunghaan.
Matud sa CAST nga kini nagpadayon bisan pa man sa ila gihimong education campaigns ug information dissemination sa mga komunidad ug sa lokal nga kagamhanan bahin sa child protection and safety.
“Children are sexually abused not only because they are marginalized as to age, but also because the powerful man can make them as a tool for sex with society accepting this role,” matud sa pamahayag sa CAST.
Matud sa CAST nga mausab lang ang panan-aw sa katilingban kung ang pamilya, simbahan ug media ingon man ang gobiyerno ug civil society organizations mahimo og mga lakang nga maundang ang pagtan-aw sa kababayen-an isip “objects of sex.”
Gilauman sab sa CAST ang papel sa kabatan-onan alang sa maong kausaban. -/GMR (BANATNEWS)
- Latest
