Mga namentaha sa pasahero DIHA sa Pier 3 gipangdakop

CEBU, Philippines — Tungod sa kadaghan sa mga mobiyahe aron makauli sa ilang mga probinsya nunot sa Kalagkalag kagahapon ug karong adlawa, nigara usab ang mga mangingilad diha sa mga pantalan.

Sugod niadtong adlaw nga Miyerkules sa hapon hangtud kagahapong adlawa onse ka mga dispatcher nga nangilad pinaagi sa pagbaligya og mahal nga mga ticket sa barko ngadto sa mga pasahero ang nadakpan diha sa Pier 3 sa Dakbayan sa Sugbo.

Ang mga gidakop mao silang Dawin Pamonag ,Jimboy Berdin, Romeo Buanjug,30, Romulo Parame, Lito Rosales,36, Ireneo Pantollano 29,Jastine Baylon 23,Arman Delos Reyes 25, Christian Urgel 45 , Dennis Sallano ,43, Jojo Villanueva, 28. Senior Supt. Royina Garma nagkanayon sa media briefing kagahapon miingon nga adunay mga pasaherong mireklamo batok sa mga mangingilad nga namintaha diha sa pantalan.

Giingong didto sa Pier 3, ang mga fixers nangwarta og maayo sa mga pasahero pinaagi sa ilang modus nga pagpatuong nahutdan na og ticket sa barko apan mangita sila og paagi aron makakuha og ticket apan mas mahal na ang bayad niini.

“Sila kunwari maghahanap ng ticket, pero times two na ‘yung presyo. Naaksyunan naman ng Police Station 3,” si Garma miingon.

Ang hepe sa Waterfront Police Station nga si Police Senior Inspector Joemar Pomarejos mibutyag sa Banat News nga mireklamo sa ilang buhatan ang mga tagiya sa mga shipping company bahing aning mga bentahoso sa pantalan.

Giingong modus nila ang pagpalit nang daan og daghang ticket ug ibaligya sa mas mahal nga presyo diha sa mga pasahero nga naglinya sa mga ticketing booths.

“Ilang ingnon ang mga naglinya nga ‘sir fully booked na palita na lang ni akong ticket.’ Mahal na. Naa say uban nga ang gusto sa pasahero kay business class pero ordinary or economy ra diay ang ihatag, unya ang presyo niya pang business class gyud. Naa guy uban maghilak na lang,” si Pomarejos miingon.

Butyag sa maong hepe nga ‘caught in the act’ ang mga suspek apan di nila makasohan og anti-scalping sanglit walay ingon niini nga ordinansa ang siyudad.

“Gimonitor namo, nasakpan nga mga barker man sad diay ni sila sa mga taxi diha sa pier, mao tong gidakop namo sila sa anti-dispatching ordinance,” pagklaro pa sa maong hepe.

Ang anti-scalping mao ang dili otorisadong pagbaligya usab sa mga ticket. Padayag sa maong hepe nga kon dili kini mapakgang madaot ang imahen sa siyudad ug makaapektar kini sa turismo.

“Mangayo ko og cooperation sa mga passengers and sa general public not to tolerate ning mga tawhana, Do not avail the service of these people. Bahalag taas ang linya adto na lang mo sa ticketing booth kay sigurado pa,” dugang pa niya. -/IBM (BANATNEWS)