Skatepark ibutang sa Fort San Pedro, subhan karong Disyembre
CEBU, Philippines — Gilauman nga karong buwan sa Disyembre mahitabo ang groundbreaking sa P12 milyones nga kantidad nga skatepark nga tukuron sa likod nga bahin sa Fort San Pedro.
Si Konsehal Eugenio Gabuya Jr., chairman sa Committee on Games, Amusement and Sport miingon nga nahan-ay na nila ang maong kalihukan human ilang na-finalize ang design dili palang dugay.
Kahinumduman nga si Maria Victoria “Minnie” Osmeña mi-donate og P5 milyones sa kagamahanan sa Siyudad sa Sugbo alang sa paghimo og skatepark.
Ang siyudad mogamit sa city-owned property nga naa sa likod nga bahin sa Fort San Pedro sa may dalan A. Pigafetta nga dunay total land area nga 404,000 square meters.
Tukuron unta ang skatepark sa South Road Properties kun asa ipahimutang ang sport hub, apan si Mayor Tomas Osmeña buot nga mauna og tukod ang skatepark alang sa mga mahiligon og skateboarding hinungdan nga gibalhin ang venue alang niini, hinoon ang sports hub magpabilin sa SRP. “Kay sige man sad og follow-up ang mga batan-on, you know mga 200,000 ka mga skaters nga boarders nga magsige og follow-up niya makalolooy man sila kay og naka-remember mo duna man tay ordinance nga gi-approve nga gi-ban sila diha sa sidewalk so luoy na kaayo sila”, dugang ni Gabuya.
Sa kasamtangan ang city government adunay P5 million nga pundo sa paghimo sa skate park ug ang maong pundo alang lang una kini sa phase 1 sa proyekto.
Kuwang pa kini og P7 million nga abagahon sa siyudad. Hinoon masaligon si Gabuya nga daghan pa unya ang mo-sponsor alang sa maong katuyuan.
Human unya sa ground breaking magsugod dayon ang pagtukod sa naasoy nga pasilidad nga gibana-banang molanat og tulo ka buwan.
Samtang wala pa matukod ang skatepark ang mga skate boarder temporaryong migamit sa Cebu City Sports Institute (CCSI) sukad niadtong Oktubre 17 nga bukas sa alas 9 sa buntag hantod sa alas 10 sa gabii matag adlaw. -/DILT (BANATNEWS)
- Latest
