PRO-7 mopahugot sa seguridad sa Guihulngan

CEBU, Philippines — Magtinabangay ang Police Regional Office-7 ug Armadong Kusog sa Pilipinas paggukod ug pagpalig-on sa seguridad sa Guihulngan City human sa pagpangatake sa mga rebeldeng komunista sa miaging adlaw.

Ang pagpang-harass nahitabo sa Upper Mandi-e, Barangay Hinakpan, sa maong siyudad niadtong Martes sa udto diin miresulta sa pagkaangol sa usa sa mga polis.

Butyag sa direktor sa Police Regional Office-7 nga si Chief Supt. Debold Sinas nga atol sa pagbisita ni Chief PNP Oscar Albayalde diri sa Sugbo, miluwat kini og direktiba nga gawas sa pagpalig-on sa ilang depensa ug agresibong pagpatrolya mimando kini nga dili iabandonar ang maong lugar.

“We might relocate to a better position, but we will not abandon the place,” butyag ni Sinas aol sa press conference kagahapon.

Motabang kanila ang Central Command- Armed Forces of the Philippines sa pagbantay niini ug pagbutang og mga checkpoints duol sa lugar aron malikayan ang pag-awas sa peligro sa mga komunidad sa lugar.

Si Albayalde miabot sa Sugbo niadtong Martes aron tambongan ang pribadong pulong ni Presidente Rodrigo Duterte.

Niadtong Martes sa udto, samtang naginspeksyon sa bag-ong patrol detachment sa Regional Mobile Force Patrol Battalion (RMFB), Regional Support Service Force (RSSF)ug Provincial Mobile Force Company (PMFC) sa Negros Oriental Provincial Police Office, kalit silang girakrakan sa 15 ngadto sa 20 ka mga gituohang miyembro sa Kilusang Rehiyonal Negros (KRN) sa New Peoples Army.

Naigo sa tiyan si Police Officer 1 Elvis John Lucasan, sakop sa pwersa sa RSSF ug niining pagsuwat anaa na kini sa luwas nga kahimtang matud ni Sinas. Gibanabanang  700 ka metros ang distansya sa mga nangatake gikan sa posisyon sa mga polis mao nga giisip nila kining usa ka matang sa pagpang-harass.

Nagtuo si Sinas nga nabalaka ang mga rebelde sa maong bag-ong kampo sa pwersa sa gobiyerno kay agianan kini pasulod ug gawas sa ilang teritoryo ug maapektahan ang ilang mga lihok. -/IBM (BANATNEWS)