Tenants sa Larsian gipaubos sa hygiene seminar

CEBU, Philippines – Gipaubos kagahapon sa seminar kabahin sa hygiene ang mga tenant ug  ang ilang mga trabahante sa Larsian Barbeque.

Ang “Food Safety and Hygiene Orientation” gihimo pagtubag sa isyu sa  kalimpiyo sa barbeque strip ug subay sa  pagpangandam sa pagbukas na sa Larsian sa bulan sa Nobiyembre karong tuiga.

Matud ni Joey Herrera, administrator sa maong food strip nga importante nga mahibalo ang mga tenant ug mga trabahante sa kaimportante sa kalimpiyo sa palibot ug pag-andam sa mga pagkaon sa ilang mga kustomer.

Si Herrera nanghinaot nga ang mga tenant ug trabahante makasabot kabahin sa food handling, hygiene diin kinahanglan nga magsul-ob og mask, hairnet ug apron.

Usa sa plano sa tagdumala sa Larsian mao nga adunay uniform sa mga personnel sa maong pasilidad sa pagbukas niini og balik.

Nunot niini, ang  kabahin sa presyo sa mga baligya anaa ra kini sa pagbuot sa mga tenant apan kinahanglan sila nga  mosubay sa presyo nga gi-set sa Department of Trade and Industry (DTI) ug motuman sa  tanang regulasyon sa national ug sa Dakbayan sa Sugbo.

Si Herrera nagkanayon nga sa pagbukas og balik sa Larsian aduna nay ibutang nga menu sa mga lamesa sa mga mokaon aron makahibalo kini sa presyo sa ilang mga gipamalit sanglit usa sa mga reklamo kaniadto sa mga kustomer mao ang “over pricing”.

Dugang ni Herrera nga dili lang sa mga barbeque strip magtutok ang Larsian sanglit aduna nay daghan nga kapilian sa maong pasilidad sa pagbukas niini. (/BDB)(BANAT NEWS)