4 ka polis sa Carmen gikiha
CEBU, Philippines — Upat ka polis sa Carmen Police Station ang pormal na nga gipasakaan og kasong kriminal ug administratiba sigun sa direktor sa National Bureau of Investigation 7 nga si Atty. Dominador Cimafranca.
“Among the charges are murder, falsification, dereliction of duty,” tug-an ni Cimfranca sa Banat News.
Ang mga polis mao sila si Police Officer 2 Cristito Aresco, PO2 Everett Capuyan, PO2 Gleann Molina ug lakip na ang ilang hepe nga si Police Chief Inspector Christian Torres.
Wala si Torres sa maong panghitabo apan giisip siya nga accessory sa krimen sanglit siya ang hepe.
Gilakip sab sa maong kaso ang usa ka alyas Jonathan, ang giingong sulugoon sa mga polis ug gikatahong maoy nagtudlo ngadto sa polis nga si Reymark Taoy Quingco mao si Joseph Taoy, ang gipangita sa kapolisan. Si Joseph Taoy mao ang gikatahapang drug pusher sa maong lungsod.
Apan tak-om ang direktor kabahin sa pasangil ni Police Senior Supt. Manuel Javier Abrugena, direktor sa Cebu Police Provincial Office, nga harassment sa kapolisan ang maong kaso.
Samtang gidapigan sa Police Regional Office-7 ang mga nalambigit nga polis ug giingong mag-agad ra sila sa rekomendasyon ni Abrugena una pa sila mohimo og internal investigation kabahin sa maong kaso.
“We will be standing by the pronouncement of our police in Carmen nga it was a legitimate operation. If there is a direct cases filed against them, so be it. Dili ta malisang ana nga kaso because if you will be scared sa kaso then dili na motrabaho ang atong polis,” ang tigpamaba sa PRO-7 nga si Police Supt. Reyman Tolentin nagkanayon.
Nasayran nga niduso og rekomendasyon ang NBI-7 ngadto sa Department of Justice nga pasakaan og kriminal nga kaso ang upat ka polis diin lakip na ang ilang hepe ug usa ka sibilyan human nasuta sa ilang imbestigasyon nga mistaken identity ug walay buy-bust nga nahitabo ngadto kang Quingco.
Nakakuha og unom ka saksi ug closed circuit television (CCTV) footage ang maong ahensya nga maoy gihimong basehan sa kaso. Gihimug-atan sa kabanay nga si Quingco ang nakalas ug dili si Taoy. (BANAT NEWS)
- Latest
