300 residente sa Buhisan pabakwiton

CEBU, Philippines — Girekomendar sa committee on disaster risk reduction and management and climate change adaptation sa konseho sa Siyudad sa Sugbo ngadto sa Cebu City Disaster Risk Reduction and Management Office ang pagpangita og relocation site sa dili mominus 300 ka indibidwal sa Sitio Sandayong, Barangay Buhisan.

Si Buhisan Barangay Kapitan Gremar Barete nakadawat og report labot sa pangpangliki sa yuta nga giingong resulta sa 7.2 magnitude nga linog niadtong 2013.

Ang chairman sa komitiba, Konsehal Dave Tumulak, niingon nga niumol sa maong ideya human iyang nakita nga kinahanglan kini buhaton aron dili makamugna og dugang danyos.

Matud niya nga ang nahitabo sa Siyudad sa Naga magsilbi nga eye opener sa tanan dungan sa pagbutyag nga ang mga hingtungdang ahensiya angayan andam sa mga katalagman.

“Naghatag ta og recommendation ngadto kang Nagiel Bañacia pagpangita og relocation site diin duna tay pundo sa disaster fund pagpalit og property,” matud ni Tumulak.

Nakapangutana si Tumulak kung nganong walay gihimo ang kagamhanan sa rekomendasyon sa Mines and Geosciences Bureau alang sa dinaliang pagpabakwit sa mga apektado niadtong 2013.

Si Tumulak niasoy nga angayan masabtan sa mga residente ang kasamtangang sitwasyon sa dapit hinungdan nga ang kagamhanan sa siyudad inubanan sa tabang sa ubang buhatan nihimo sa ilang trabaho aron maseguro ang kaluwasan.

Sa iyang bahin, si Kapitan Barete niingon nga ang MGB-7 mo-reassess sa apektadong dapit aron makaumol og bag-ong rekomendasyon.

Kini niasoy nga ang CCDRRMO nipahigayon og inspection niadtong Sabado ug gilauman nga maduso kini ngadto sa MGB-7 alang sa revalidation sa findings.

Mahitungod sa relocation, ang barangay dunay na-identify nga area nga nahimutang sa Sitio Dulhugan ug asoy sa kapitan nga dunay negosasyon nga nahitabo tali sa tag-iya sa luna ug sa mga opisyal sa barangay. (BANAT NEWS)