Kapitolyo nihatag og P212.9M sa barangay projects

CEBU, Philippines – Nikabat ngadto sa P212.9 milyones ang nagasto sa Probinsiya sa Sugbo sa mga proyekto ngadto sa kabarangay sa lalawigan.

Ang Barangay Affairs Office sa Kapitolyo nibutyag nga ang maong pundo nagasto kini sukad sa bulan sa Enero hangtud sa bulan sa Septiyembre niining tuiga.

Si Jhames Canoy, pangulo sa maong buhatan nibutyag nga ang maong pundo gigahin alang sa road concreting, pagtukod og daycare centers, barangay halls, covered court, spillway, water system, socio cultural ug paghatag og mga mini ambulance diha sa kabarangayan.

Base sa record sa BAO, nikabat ngadto sa P21.8 milyones ang nagahin nga pundo sa unang distrito; P56 milyones sa ikaduhang distrito; P33 milyones sa ikatulong distrito, P31 milyones sa ikaupat nga distrito; P48 milyones sa ikalima nga distrito; P9 milyones sa ikaunom nga distrito ug P11 milyones sa ikapito nga distrito.

Si Canoy nagkanayon nga ang pagpatuman sa maong proyekto nagsugod kini sa mga request nga tabang sa mga barangay ngadto sa Kapitolyo pinaagi sa ilang buhatan.

Human sa pag-assess sa BAO ilaha kining paaprobahan ngadto sa gobernador ug papundohan. (/BDB)(BANAT NEWS)