Mga iro, ubang hayopan butangan og microchips
CEBU, Philippines – Mga iro sa Dakbayan sa Sugbo giingong pamutangan na og microchips aron sayon nga mailhan sa mga tag-iya niini sa higayon nga makapaak kini.
Kini ang gitug-an ni Dr. Alice Utlang, pangulo sa Department of Veterinary Medicine and Fisheries nga nahinabi sa Banat News.
Matud ni Utlang nga nihimo ang ilang buhatan og rekomendasyon sa city council aron tanang mga kahayopan sama sa iro, iring, baka ang mabutangan na og microchips.
Ug kong mapalabang sa konseho sa siyudad ang maong balaodnon mahimo na unyang mandatory ang pagpamutang og microchips sa mga hayopan.
Sa pagkakaron aduna na silay mga gipangtauran og microchips diin mobayad og P350 ang mga tag-iya sa iro, P150 sa registration ug P200 sa chips.
Sa pagkakaron aduna silay gihimo nga libreng serbisyo diha sa kabarangayan diin kinahanglang iparehistro sa mga tag-iya ang ilang binuhing hayop.
Dugang ni Utlang nga ang pagbutang og microchip sa mga iro makahatag ni og dakong tabang sa mga mapaakan kay dili na man maka-deny ang mga nanag-iya niini. (/BDB)(BANAT NEWS)
- Latest
