Konsehal nga nitahan tungod sa drugas gipatay

CEBU, Philippines — Konsehal sa Lungsod sa Siquijor gipusil patay sa wala pa mailhing mamumuno didto sa merkado sa barangay Poblacion sa ilang lugar niadtong Huwebes sa unang adlaw sa filling sa Certificate of Candidacy.

Ang biktima giila sa kapolisan nga si Domingo Arcamo II, 50 anyos, residente sa Lazi, Siquijor.

Sigun pa ni Police Supt. Enrique Belciña, Deputy Provincial Director for Administration sa Siquijor Provincial Police Office nga sa inisyal nga imbestigasyon nagkuha ang biktima sa iyang asawa nga pharmacist sakay sa iyang Nissan Navara nga sakyanan.

“Routine na gyud na niya nga kuhaon iyang asawa. Pharmacist na siya sa Siquijor District Hospital,” si Belciña miingon.

Sa wa pa sila manguli giingong nanghapit sila og usa ka pawnshop.

Dihang nakasulod na sa maong pawnshop ang asawa, giingong gitirahan ang biktima sa duha ka wa pa mailhing lalaki nga nag-angkasay og motorsiklo.

Gidala pa sa tambalanan ang biktima apan giingong gideklarar kining dead on arrival.

“Nakita sa CCTV footage nga gisunod-sunoran gyud siya sa mga suspek,” matud pa sa maong opisyal.

Butyag sa maong opisyal nga tulo ka anggulo ang ilang gitutokan: drugas, politika ug personal nga kabangi.  Matud pa sa maong opisyal nga naapil sa listahan sa mga drug surrenderee ang biktima.

Gidungog sab nga magpapili kini og balik alang sa ikatulo unta nga termino kon kini makadaog sa mid-term elections sunod tuig. (BANAT NEWS)