Chiong gihagad padaganon pagka bise gobernador

CEBU, Philippines – Deretsong gitubag ni City of Naga Mayor Kristine Vanessa Chiong nga wala siyay tinguha nga magpapili og taas nga posisyon bisan og gitanyagan siya ug ang iyang amahan nga si kanhi mayor Valdemar Chiong nga padaganon pagka bise gobernador sa Lalawigan sa Sugbo.

Gipadayag ni Mayor Chiong nga aduna pa siyay padayunon sa dakbayan ilabi na nga dili pa lang dugay naigo kini sa trahedya.

Wala pa siya masayod sa desisyon sa iyang amahan sa gitanyag kanila sa One Cebu, apan iyang gihimug-atan nga magpabilin siya sa Naga ug dili magpapili sa mas taas nga posisyon.

Gitug-an ni Chiong, magpaabot sila sa partido ni kongresista Samsam Gullas, kay sa pagkakaron anaa sila sa Nationalista, Alayon ug PDP Laban.

Mapasalamaton hinoon ang mayor nga gihatagan sila og kahigayonan nga malakip ilang pamilya sa mahatagan og kahigayunan nga magpapili sa taas nga posisyon. Si kanhi mayor Val, sa iyang bahin tak-om una sa maong kalambuan kay iya pa kining pamalandongan ug hinabion ang iyang pamilya. (/DILT)(BANAT NEWS)