BPO workers hatagan og transpo

CEBU, Philippines — Subay sa nahitabo sa niaging semana nga naglambigit sa usa ka call center agent, ang kagamhanan sa Dakbayan sa Sugbo mohatag og transportasyon sa mga call center agents aron maseguro ang ilang kaluwasan.

Sa Facebook post ni Cebu City Mayor Tomas Osmeña niadtong Oktubre 5 iya kining gipahibawo human sa meeting sa Business Process Outsourcing (BPO) companies niadtong Biyernes aron pagtubag sa kabalaka labot sa kaluwasan sa mga trabahante.

“Starting in Mabolo, we will implement a small bus system that fetch workers from their homes/ safe pick up points and shuttle them to and from work. You will not have to travel alone,” tipik sa post sa mayor.

Ang seguridad sa mga empleyado sa BPO ang major concern sa mayor gumikan sa nahitabo kang Loraine Temple, 37, call center agent kinsa gipusil patay dihang nisukol sa mga tulisan sa Barangay Mabolo.

Gani ni-post sab ang mayor nga si Gobernador Hilario Davide III nihatag og pagtugot sa siyudad nga gamiton ang luna sa probinsiya sa may I.T Park isip terminal sa bus system.

“Clearing operations have already begun in both the province and Cebu City’s properties. Thank you very much to Gov. Davide for helping keep our BPO workers safe,” matud sa mayor.

Sa mga dunay motorsiklo ug sakyanan pwede sab sila mo-park sa maong lugar.

Gawas sa implementasyon sa bus system sa BPO workers, ang siyudad mobutang sab og closed-circuit television (CCTV) camera sa kadalanan aron ma-monitor ang bisan unsa nga klase sa krimen.

Nagkanayon si Osmeña nga makig-alayon sila og mga volunteers alang sa neighborhood watch scheme nga mo-escort sa mga call center agents nga nagtrabaho sa gabii sa mga naila nga “problematic” areas.

Sa implementasyon sa neighborhood watch, mas epektibo kOn ang volunteers lumad nga residente sa dapit sanglit nasayud sila sa lugar ug ang ilang presensya makapakgang sa krimen.

Ang siyudad nipasalig nga mohatag og flashlights, snacks ug ubang gamit alang sa set up sa neighborhood watch.

Nunot niini, si Osmeña nagtinguha nga makig-alayon sa organized habal-habal drivers aron motabang pag-monitor sa BPO workers.

“Barangay Kasambagan has a very organized habal-habal system where all the drivers are registered with the barangay, so we will use their system to help with the watch as well as give workers to use their service as transportation,” dugang sa mayor. (/GMR)(BANATNEWS)