Pamilya ni temple gipasagdan sa polis

CEBU, Philippines — Tulo ka grupo sa mga kriminal lakip niini ang mga bag-ong laya sa prisohan sa kasong pagpangawat ang gitutokan karon sa kapolisan nga maoy nagpaluyo sa pagtulis ug pagpusil patay  sa call center agent nga si Loraine Temple.

Dili lang hustisya ang singgit sa pamilya sa 37-anyos nga biktima apan lakip na ang solusyon aron malikayan nga mausban ang susamang krimen nga mobiktima sa ubang call center agents.

Nasayran nga naglakaw ra sa eskina sa Pope John Paul Avenue ug dalan Guibilundo, Mabolo, Dakbayan sa Sugbo niadtong Oktubre 4 si Temple dihang gilabnihan sa iyang bag ug dayon gipusil sa wala pa mailhing mamumuno nga sakay sa motorsiklo.

“We want solutions. Above justice we also want solutions to the systemic problem,” matud sa maguwang ni Temple nga si May Temple-Maravilles, 41.

Reklamo ni Maravilles nga bisan kausa wala sila duola sa polis kabahin sa nahitabo kang Temple ingon man sa estado sa dagan sa imbestigasyon niini.

Nunot niini nahadlok ang pamilya nga malubong na lang sab sa kalimot ang nahitabo ni Loraine ilabi na kun iuli na nila sa Zamboanga City ang patay’ng lawas niini karong Lunes.

“Since she was killed, no police, no authority or government officials or barangay officials has approached us. Kami pay moadto sa ilaha. Katulo pa mi nagbalik-balik sa police to get a police report, that is just a police report. Nawagtangan na mi og kinabuhi unya kami pa ang mag-apas sa ilaha?” si Maravilles nagkanayon.

Dugang niya nga wala man gani mauli ang mahalong sapatos ug relo sa biktima nga gisul-ob pa niini dihang napusilan na siya.

Depensa sa hepe sa Mabolo Police Station, Chief Inspector Dindo Juanito Alaras, nga mas nipokus sila sa pagsubay sa mga suspek maong wala sila makaduol dayon sa pamilya.

“Pasalig namo nga dili gyud na namo undangon nga dili na makuha. Dili lang para kang Temple but ato sad nga gi-consider ang mga would be victim para sad ma-prevent na ni. Maningkamot mi nga madakpan sila aron dili mautro ang panghitabo,” matud ni Alaras.

Gikasubo sab sa pamilya sa biktima ang pagdumili sa publiko nga pagtabang sa biktima dihang nag-ubo kini sa karsada ug nahiagum na og samad pinusilan.

“Buhi pa man diay unta akong sister kadtong gi-videohan siya, that was an hour after she was shot but no one even bothered to pick her up and bring her to the hospital. Niingon ra nga ‘oy kaluoy, uy buhi-buhi pa diay? uy kaluoy’ pero walay gibuhat, walay nagpakabana, di mana siya fractured bone nga dili nimo dapat hilabtan basin og maka-cause og further fracture ang paghilabot,” si Maravilles nagkanayon. (/GMR)(BANATNEWS)