Dalagita gilugos sa ama-ama misumbong

CEBU, Philippines – Usa ka 15-anyos nga batang babaye gilugos sa iyang 48 anyos nga ama-ama didto sa lungsod sa Liloan.

Gipugngan ang pangalan sa duha alang sa proteksyon sa biktima kinsa tinun-an sa grade 9. Sumala pa sa hepe sa maong lungsod nga si Police Chief Inspector Jose Angelo Acupinpin nga niadtong Martes misumbong ang maong bata ngadto sa ilang guidance counselor kabahin sa pagpanamastamas kaniya sa iyang ama-ama.

Ang bata mitug-an nga sukad pa niadtong 12 anyos pa lang siya ilabi na niadtong mga panahon nga wala sa ilang balay ang iyang inahan kay nagtrabaho kini gilugos sa suspek. Gani matud pa nga sa wala pa siya misulod sa klase niadtong adlaw nga Martes gihilabtan na usab siya sa iyang ama-ama. Dali nga nakig-alayon ang guidance counselor ngadto sa kapolisan hinungdan nga nadakpan gilayon ang maong suspek didto sa ilang panimalay.

“Ingon sa bata nga prior pa sa iyang pag-report, kapila na siya gihilabtan sa iyang stepfather pero wa lang siya mitug-an pati sa iyang mother kay mahadlok siya. Iyang mama kay dili man supportive niya wala gani siya ubani dihang nisumbong na siya,” sigun sa maong hepe.

Kasong pagpanglugos ang kasong atubangon sa maong suspetsado samtang gipaubos og medical examination and psychological evaluation ang maong bata. (Romeo/IBM)(BANAT NEWS)