Pagpanagmal likod sa matam-is nga pahiyom

CEBU, Philippines – Sa mata sa ilang mga paryente ug kahigalaan malipayon ang magtiayong Mailyn Sinambong ug Steve Abou-Bakre Aalam apan nakugang na lang ang tanan sa ulahing dugoong hitabo sa ilang pamilya kinsa mismo ang langyaw nga bana ang giingong niunay og kutlo sa kinabuhi sa iyang Pinay nga asawa.

Luyo sa matam-is nga pahiyom ug mga pamulong wala damha nga naako ni Steve og dagmal hangtod sa giingong pagkutlo niini sa kinabuhi sa iyang asawa.

Giingong labing sakit tungod kay ang maong panghitabo nasaksihan sa ilang duha ka menor de edad nga anak nga nagpangidaron og 9-anyos ug 4-anyos.

Si Steve, 50-anyos, usa ka actor ug direktor sa pelikula ngadto sa nasud sa Sweden samtang si Mailyn, 28, lumad nga taga Lungsod sa Medellin, Cebu usa ka kanhi katabang.

Si Maria Conde Sinambong, 48, inahan ni Mailyn atol sa gipahigayong press conference kagahapon nihulagway sa iyang umagad nga mapinanggaon  sa iyang anak dihang bag-ohay pa kining nagsugod sa ilang relasyon.

Niadtong Hunyo 6, 2009 si Mailyn ug Steve gikasal didto sa Saint Ignatius of Loyola Parish sa Barangay Kawit, Lungsod sa Medellin.

Ang suod nga higala ni Mailyn nga si Maria Fe Buhayan, 33, nibutyag sa Banat News nga si Mailyn ug Steve unang nagkita diha sa usa ka dakong mall sa Dakbayan sa Sugbo niadtong tuig 2007 dihang si  Mailyn nagpatabang kini kang Steve tungod kay nasaag sa mall.

“It was a love at first sight”, matud ni Buhayan.

Niadtong higayona bag-ohay lang nga nagpangidaron og 18-anyos si Mailyn ug ang kataas sa ginta sa ilang mga edad wala mahimong babag sa ilang relasyon.

Sa wala pa makasal ang duha nanganak si Mailyn sa ilang kamaguwangang anak nga lalaki ug pagsunod tuig nagpakasal ang duha.

Samtang ang magtiayon naa pa dinhi sa Pilipinas, si Steve nihunong sa iyang career sa showbiz didto sa Sweden ug nagtrabaho isip producer sa usa ka dakong film company diha sa Mactan, Dakbayan sa Lapu-Lapu. “ag-away sila from time to time pero binabaay ra sila. Kong naay pinusdakay halimbawa door, pero wa man gyud ko kakita gud nga niabot sa punto nga gipasakitan, mag-away sila pero pagkahuman pwerte man ka sweet,” hulagway ni Buhayan sa iyang higala ug bana niini.

Apan gibutyag ni Buhayan nga usa kahigayon nakakita siya og lagom sa bukton ni Mailyn apan iyaha lang kining gibalewala tungod kay nagtuo siya nga dala kini sa normal nga binuwan nga bisita sa babaye.

Matud ni Buhayan nga si Mailyn aduna usab kini sakit nga anemia niadtong tungora nga maoy usa usab sa ilang gidudahan nga hinungdan sa lagom niini sa bukton.

Duha ka buwan human gikasal si Mailyn ug Steve ang maong pamilya nibiya kini sa Pilipinas paingon ngadto sa Sweden.

Ang inahan ni Mailyn nga si Maria nibutyag nga niadtong tuig 2011 gisumbong sa iyang anak si Steve ngadto sa kapolisan sa Sweden tungod sa giingong pagpanagmal niini ngadto kaniya ug ilang anak nga lalaki apan human sa maong hitabo nagkasabot ra usab ang magtiayon.

“Ako siyang pangutan-on, unsa man pinangga ka dha? wa na ka dapati? ingon siya wala ma uy, dili siya motug-an,”matud ni Maria.

Si Angelo Monato, 24, manghud nga lalaki ug labing suod ni Mailyn nagkanayon nga wala gyud motug-an kaniya ang iyang maguwang kabahin sa pagpanagmal sa bana niini.

Apan si Maria nagduda nga ang iyang anak ug ang bana niini walay maayong relasyon hilabina nga iyang nahibaw-an nga si Mailyn nag-inusara lang kining nagpaalim sa tambalanan ngadto sa Sweden tungod sa sakit nga lupus.

Ug aron malipay ang iyang anak gipaningkamutan ni Maria nga magkaestorya sila ni Mailyn pinaagi sa video chat ug ang kataposan nilang estorya dihang nanawag si Mailyn kaniya niadtong alas 2:00 sa hapon, Septiyembre 23, adlaw’ng Domingo nga mao usab ang adlaw nga gipagawas na si Mailyn gikan sa tambalanan.

“Lain kaayo og estorya, mokalit lang siya og estorya nga Ma, kong mamatay ko Ma, pinangga kaayo tika. Love kaayo tika Ma. Ako sad ingnon nga ayaw pagsulti ana uy, pinangga man gihapon ka sa Ginoo. Pero ingon siya nga di na daw niya kaya ang iyang sakit”, butyag ni Maria.

Apan niadtong higayona gidali og pawong ni Mailyn ang tawag sa cellphone diin buot niini nga mag-video chat sila.

“Ingon siya nga Ma, pagngon na lang nako balhin ta sa mag-video kay kalas kaayo og load”. Mao ‘to pagkahuman kay wala na gyud siya nibalik og tawag. Nagpaabot gyud ko hangtod pagka-Lunes sige ko’g tawag di na motubag”, ni Maria pa.

Nianang adlaw’ng Lunes, nakadawat si Angelo og mensahe gikan sa usa ka Leonor, Pinay nga silingan nilang Mailyn didto sa Sweden kinsa maoy nipahibawo nga gipatay si Mailyn sa kaugalingong bana niini niadtong Domingo alas 11:00 sa gabii sa oras ngadto sa Sweden.

Ug pagkasunod adlaw ang maong sakit nga taho nga nadawat ni Angelo gikompirma na sa embahada sa Pilipinas.

Gawas nga buot nilang mauli ang patay’ng lawas ni Mailyn gipangayo usab sa pamilya sa Pinay nga sila ang mokustodiya sa duha ka anak.

Ang mga anak ni Mailyn kasamtangang ubos sa kustodiya sa kagamhanan ngadto sa Sweden.

Si Mailyn ang kamaguwangan diin aduna kini upat ka manghud nga lalaki ug pareho silang nagdako diha sa Lungsod sa Medellin.

Kapitolyo motabang

Nunot sa maong hitabo, si Gobernor Hilario Davide ug Bise Gobernador Agnes Magpale nimando karon sa pagsusi sa maong hitabo aron makig-alayon sa pamilya ni Mailyn.

Matud ni Magpale nga andam sila nga motabang nga mauli nganhi sa Sugbo ang patay’ng lawas sa Pinay.

Ug tanang ayuda nga mahimong mahatag sa Probinsiya ngadto sa pamilya ug kang Mailyn ilahang ihatag. (Le Phyllis F. Antojado ug Rowena D. Capistrano/BDB)(BANAT NEWS)