Kontrata sa 93-1 gipaubos sa konsultasyon

CEBU, Philippines — Hapit na mahuman ang Division for the Welfare of the Urban Poor (DWUP) sa Siyudad sa Sugbo sa ilang consultation process sa mga beneficiaries sa 93-1 alang sa pag-umol og individual contract sa siyudad.

Sigun sa operations head sa DWUP, Genevieve Alcoseba, nga sa 45 ka homeowners associations, 36 na ang ilang nakonsulta.

Ang mga beneficiaries gikan sa Barangay Kamputhaw, Capitol Site, Kalunasan, Busay, Bo. Luz, Mabolo, Apas, Lorega, San Miguel, Kasambagan ug Tejero.

Sigun ni Alcoseba nga ang iyang team nihimo na sa ground work aron mahuman nila sa saktong oras ug ma-finalize ang guidelines alang sa disposition sa properties.

Importante ang pagkonsulta sa dili mominus 5,000 ka beneficiaries aron pag-identify sa tinud-anay nga sitwasyon o kaha mga nagkalain-laing concerns sa mga recipients.

Human ang kagamhanan sa Probinsiya ug Siyudad sa Sugbo nagbinayloay og propriedad niadtong Agosto 3, ang pagpanag-iya sa luna nga ubos sa Provincial Ordinance No. 93-1 naa na sa siyudad.

Nunot niini, ang DWUP daling nagsugod sa consultation process.

Matud ni Alcoseba nga sa 36 nga ilang nakonsulta nagpahigayon sila og tagging sa dili mominus 16 ka grupo nga nagpasabot nga mao ang pagsuta sa unsay problema sa mga indibidwal nga mga beneficiaries.

Gawas sa tagging ang DWUP mokuha sab og data kon pila ang wala pa nakabayad sa property.

“Didto nimo makita sa ground ang nakabayad na then naa nay deed of sale, naa sad nakabayad na but walay titulo. Naa pud ang naka partial payment ug no payment at all,” matud ni Alcoseba.

Kini niingon nga kadtong mga beneficiaries nga naka-settle na sa ilang bayronon ug duna nay titulo sa ilang property, ang kagamhanan sa siyudad makasugod na og himo og contract sa dili pa mahuman kining tuiga.

Apan si Alcoseba niingon nga dili pa sila kahatag og saktong ihap sa mga beneficiaries nga nakahimo na og full payment sa property sanglit ang pagkuha og data nagpadayon pa.

Samtang giimbitar sa DWUP ang mga konsehal sa siyudad nga motambong sa Local Housing Board meeting karong semanaha aron makahatag sa ilang mga sugyot.

Pipila ka mga konsehal ang nakuryuso labot sa update sa disposition sa property ngadto sa mga beneficiaries ilabi na nga dugay na ang maong isyu. (BANAT NEWS)