P100 mil gigahin alang sa LTOP sa mga kapitan

CEBU, Philippines – Nipadayag sa iyang pagpabor ang kapitan sa Barangay Kasambagan ug presidente sa Association of Barangay Council (ABC) Franklin Ong nga maghupot og armas ang mga opisyal sa kabarangayan ilabi na ang mga kapitan.

Giingong isip mga front liner sa kampaniya batok sa ginadiling drugas nanginahanglan usab ang mga opisyal sa barangay nga maghupot og armas.

Gipasabot ni Ong nga ang mga ilegalista adunay mga armas ug silang mga opisyal sa barangay ang moatubang sa mga reklamo diha sa ilang lugar ilabi na ang pagmentenar sa kahusay ug kalinaw.

Nunot niini, ang Liga ng mga Barangay Cebu City Chapter nitagana og P100 mil nga pundo alang sa pagproseso sa mga kapitan sa ilang License to Own and Possess Firearms (LTOP).

Matud ni Ong nga ubos sa balaod sa Philippine National Police (PNP) ang punong barangay tugotan nga makadala og armas diha sa ilang area of responsibilities apan kinahanglan nga lisensiyado ang armas niini.

Nagpasalamat si Ong kang Police Regional Office (PRO)-7 director Chief Superintendent Debold Sinas sa pag-assist ug pagsuporta sa programa sa Liga ng mga Barangay Cebu City Chapter.

Samtang paningkamutan usab sa Liga nga ang 800 ka konsehal sa kabarangay makaproseso usab sa ilahang LTOP. (/BDB)(BANAT NEWS)