P8M nga gihatag sa kabarangayan sa Sugbo ipauli
CEBU, Philippines – Giawhag ni Association of Barangay Council (ABC) Cebu City Chapter President ug Kasambagan Barangay Captain Franklyn Ong ang mga barangay kapitan nga iuli ang P8 milyones nga financial assistance nga gihatag sa kabarangayan aron malikayan ang iregularidad.
Atol sa ilang third quarter general assembly diha sa usa sa mga hotel sa siyudad gituki ni Ong ang maong hisgutanan diin sagad sa mga kapitan mga bag-ong napili.
Sa 80 ka barangay, 50 ka kapitan lang ang nitambong sa maong kalihukan.
Kahinumduman nga niadtong tuig 2015 atol sa termino ni kanhi Mayor Michael Rama ang COA ni-disallow sa “City’s Barangays-Financial Assistance for Various Projects” gumikan sa kakuwang og authorization gikan sa konseho sa siyudad.
Ang COA nihatag og direktiba ngadto sa kabarangayan nga iuli ang pundo ug mosumitir og detalyadong dokumento kabahin sa paggasto sa kwarta aron ang konseho ma-notified niini.
Base sa record adunay walo ka barangay ang niuli sa ilang financial assistance nga naglangkub sa Buhisan, Capitol Site, Cogon Ramos, Kinasang-an, Pahina Central, Talamban, Tejero ug Banilad.
Human pag-uli sa kwarta ang executive department nilakip niini sa supplemental budget niining tuiga.
Gumikan sa pagtuman sa mga proseso ang city council mitugot sa City Treasure’s Office nga mo-disburse sa financial assistance sa pito ka barangay.
Matud ni Ong nga adunay ubang mga barangay nga nibalik sa ilang kwarta apan napakyas sa pagsubmitir og project proposals.
Ang nahisgutang mga barangay gilangkuban sa Busay, Kalubihan, Kasambagan, Luz, Mabini, Mabolo ug uban pa.
Ang mga barangay kinsa nakagamit sa katunga sa pundo ug wala makasumitir og liquidation ang mapasakaan gyud og kaso base sa mando sa COA. (/BDB)(BANAT NEWS)
- Latest
