500 drug addicts nilampos
CEBU, Philippines — Dul-an 500 na ka mga drug surrenderer ang nakatapos na sa upat ka bulan nga drug rehabilitation program nga gihimo sa Lungsod sa Catmon sumala pa sa Cebu Provincial Anti-Drug Abuse Office (CPADAO). Base sa talaan sa CPADAO moabot na og 458 na ang nakakumpleto sa community based treatment program sa maong lungsod niadtong Septiyembre 21.
Aduna pay mosunod dul-an 500 ka mga drug surrenders nga mahimo unya nga “completers” matud ni Ivy Durano – Meca ang pangulo sa CPADAO.
Sa niaging mga bulan, ubay- ubay usab ang nakatapos sa pipila ka bulan nga community based-treatment program sa uban pang mga lungsod. Didto sa lungsod sa San Francisco isla sa Camotes, 803 usab ka drug surrenderers ang nahimo ng “completers” niadtong Agosto 29. Samtang sa Madridejos, 154 na usab ang ilang “completers” niadtong Agosto 15. Matud ni Meca sa tibuok probinsya sa Sugbo, 7,800 ang na enroll sa community based-treatment program sa kalungsoran, kon diin kapin kwatro mil na ang nakalampos.
Ang dakong hagit nga ila karong gitutokan mao ang “aftercare” ug “reintegration program” sa mga nakakumpleto sa programa aron sila dili na mobalik pa sa paggamit og ilegal nga drugas.
Nasayran nga pipila ka mga drug surrenderers nga nakakompleto na sa nagkadaiyang drug rehabilitation programs ang nibalik sa ilang bisyo diin ang uban nadakpan ug aduna say napatay sa mga otoridad. (BANAT NEWS)
- Latest
