Kawayan gipananom sa Asturias ug Balamban

CEBU, Philippines — Mokabat og singko mil ka punoan sa kahoy ang gitanom kagahapon sa bukirang bahin sa Lungsod sa Asturias ug Balamban.

Ang maong kalihukan gitumong sa selebrasyon sa World Bamboo Day diin matud ni Jules Regner, ang tigpamaba sa Provincial Disaster Risk Reduction and Management Office, kwatro mil ang ilang gitanom nga mga kawayan. Diin ang maong gidaghanon doble kon itandi sa gitanom nila sa miaging tuig.

Gawas sa mga kawayan, nagtanom usab sila og usa ka libo nga mga kahoy nga mamunga sama sa nangka.

Aduna say mga wood-type trees sama sa mahogany.

Giklaro ni Regner nga "tree growing" ang maong kalihukan ug dili lamang pagpananom.

Ang mga barangay nga nahingtungdan maoy mosiguro nga himsog ug mabuhi ang natanom nga mga kahoy.

Mihisgot kini nga ang pagpananom og kahoy usa ka importante nga aspeto aron sa pagpakunhod sa epekto sa kalamidad nga moabot sama sa nahitabo nga landslide sa  Brgy. Tinaan, Dakbayan sa Naga niadtong Huwebes nga mikalas og mga kinabuhi.

Usa ka libo ka tawo ang misalmot sa maong kalihukan gikan sa PDRRMO, Provincial Environment and Natural Resources Offices (PENRO),  JCI Metro Cebu Uptown, Asturias Poultry Growers, Kabilin Nature Farms Foundation, mga hingtungdan nga barangay ug uban pang sponsors.

Aduna say  volunteers gikan sa nagkalain-laing fraternities, tunghaan ug non-government organizations nga miunong.

Sunod tuig, nanghinaot ang PDRRMO nga mas daghan pang siyudad ug lungsod ang mosalmot niini diin ang mga lungsod sa Alcantara ug Ronda mipadayag na og inisyal nga interes nga mosalmot sa samang kalihukan sunod tuig. (/DILT)(BANATNEWS)