Libro nga ‘Sayaw Sugbo’ gilusad

CEBU, Philippines – Gilusad ang libro nga “Sayaw Sugbo” sa Casa Gorordo Museum diin gituki ang pagbuhi og balik sa mga Sugbuanong sayaw nga hinay-hinay na nga nawala.

Si Professor Caesar T. Nimor, co-author sa libro ug magtutudlo sa University of Cebu, niangkon nga nawala na gyud ang mga folk dances nga Sugbuanon maong gilusad niya ug ni Mila Janson ang libro aron matuki ang importansya sa pag-ila sa kaugalingong kultura.

Asoy pa ni Nimor nga ang kabatan-onan karon wala na kaila sa Cebuano Folk Dances ug gani mas interesado na sa hip-hop dance sa ubang nasud.

Mapasigarbuhong giasoy ni Nimor nga bisan sa Mindanao siya nidaku, lahi ang iyang gugma sa kultura sa Sugbo mao nga iya gikuha nga inspirasyon sa paghimo sa libro.

Nasayud ang mga dance enthusiasts sa Sugbuanong sayaw nga lisud kat-onon apan kung tan-awon sa sinugdanan, ang folk dance mao ang pagpadayag sa kaugalingong kultura.

“Dance is the best way to express culture and that’s what sets us apart from the kingdom animalia,” sigun pa ni Nimor.

Pipila sa mga folk dances nga gipasundayag sa nagkadaiyang dance groups sa Sugbo mao ang Sampaguita, Gumonhap, Surtido, Sinulog ug uban pa diin base sa panukiduki, ang Visayan Folk Dance naimpluwensiya ra sab sa mga silingang rehiyon ilabi na sa mga Espanyol ug Amerikano.

Apan kasagaran sa mga Visayan Folk Dance indigenous na ug gani ang pagsayaw sa kandila ug Sinulog na lang ang kasagaran nga mailhan mao nga malipayon si Nimor nga abli ra nga gidawat ang ilang pagdukiduki ug pagtala sa mga sayaw sa Sugbo sa mga nagkadaiyang magtutudlo, estudyante, Sugbuanong dance enthusiasts ug katawhan nga nihatag og bili sa kultura sa Sugbo.

“We don’t have any other home, except Cebu. Bisan og moadto pa ta og laing nasud, we are still Cebuanos which means we should love our culture and the best way is to love our own,” tambag ni Nimor.

Ang libro nga “Sayaw Sugbo” mapalit sa kantidad nga P720. (/GMR)(BANAT NEWS)