NBI-7 niimbestigar na sa pagpatay kang Mayor Blanco

CEBU, Philippines – Gisugdan na sa National Bureau of Investigation (NBI)-7 ang imbestigasyon sa pagpatay sa mayor sa Lungsod sa Ronda nga si Mariano Blanco kinsa gipusil sulod diha sa iyang buhatan niadtong Septiyembre 5 niining tuiga.

Matud ni Atty. Dominador Cimafranca, officer-in-charge sa NBI Central Visayas nga gisugdan dayon nila ang imbestigasyon human nipadala niadtong nilabay’ng semana og formal letter request ang pamilya ni Blanco.

Ang mga sakop sa NBI nakasusi na kini ngadto sa crime scene ug padayon ang pagkuha sa mga ebidensiya lakip na usab ang pagsukit-sukit sa mga saksi sa krimen.

Matud usab ni Cimafranca nga apil sa ilang himuon mao ang pagkuha sa footage sa Close Circuit Television (CCTV) sa Lungsod sa Ronda. Ang NBI makig-alayon usab kini sa kapolisan sa mao nilang imbestigasyon.

Ang kapolisan aduna kini giumol nga Special Task Group kinsa gitahasan sa imbestigasyon sa hitabo.

Nunot niini, si Gobernador Hilario Davide, III una nang niawhag sa NBI nga moapil sa imbestigasyon sanglit nagtuo kini nga adunay maayo nga “investigating skills” ang mga ahente sa maong ahensiya. (/BDB)(BANAT NEWS)