50 ka polis gipa-retreat
CEBU, Philippines – Gipadayag sa Apostolic Administrator of the Military Ordinariate of the Philippines nga si Bishop Oscar Jaime Florencio nga wala silay katungod mokondenar sa binuhatan sa polis apan aduna silay dakong mahimo sa pagpahinumdum sa mga sugo sa Diyos. Kagahapon naabot diha sa Police Regional Office (PRO)- 7 si Florencio aron ipaubos ang kapolisan sa retreat nga gitawag og “Kaunting Pahinga”.
Si Florencio nipanalangin sa mga polis diha sa PRO-7 ug nipadayag kini sa iyang suporta ngadto sa kapolisan.
"When we condemn, we are judging already. Who are we to judge? What we can do is to keep on reminding because the more we are reminded, the more that we are attune”, matud ni Florencio atol sa press conference kagahapon.
Ang Kaunting Pahinga nga programa gigama kini ni Cardinal Luis Antonio Tagle diin gisugdan didto sa National Capital Region ug karon sa Sugbo.
Mga 50 ka polis ang ipaubos sa tulo ka adlaw nga retreat nga magsugod karong adlawa diha sa Redemptorist Retreat House, sa Nivel Hills, Barangay Lahug, Dakbayan sa Sugbo.
Si Chief Superintendent Debold Sinas, direktor sa PRO-7 nagkanayon nga ang maong 50 ka polis mga key personnel kini sa PRO-7 ug adunay pipila ka hepe. (/BDB)(BANAT NEWS)
- Latest
