Dunay kaso sa drugas ipaubos sa plea bargaining

CEBU, Philippines – Ang Dakbayan sa Talisay nipatuman og plea bargaining  agreement alang sa mga priso nga adunay kasong paghupot og ginadiling drugas tungod sa kahuot na sa prisohan sa siyudad.

Si Superintendent Marlu Conag, hepe sa kapolisan sa siyudad nagkanayon nga nisugwak na gyud ang gidaghanon sa mga priso ug pabor sila sa maong pamaagi.

Matud ni Conag nga modaghan pa gyud unya ang mga priso tungod kay kanunay silang mopahigayon og mga operasyon sa paggukod sa mga ilegalista. Giingong ubos sa plea bargaining ang usa ka tawo nga masikop kinsa naghupot sa ginadiling drugas ang papilion kon mopirma ba kini sa kasabotan o dili.

Ug kong mopirma pasabot kini nga giangkon niini nga aduna siyay nahimong kalapasan sa balaod ug andam kini nga mopaubos sa Aftercare Program ug ipaubos usab kini sa drug test.

Si Dr. Rey Bautista, hepe sa Aftercare Program sa dakbayan nibutyag nga nidaghan ang ilang kliyente tungod kay ipaagi man diha sa ilang buhatan ang mosulod sa plea bargaining agreement.

Si Bautista nirekomendar  nga isumitir ngadto sa korte  ang nipaubos sa plea bargaining agreement pagmatuod  nga nituman kini sa kasabotan.

Sa nasayran, ang detention cell sa Talisay City Police Station grabe na kahuot gumikan sa sunod-sunod nga pagdakop sa mga ilegalista. Ang Talisay City Jail naghuot usab kini diin ang maong pasilidad aduna lang kini kapasidad nga 100 ka tawo apan niabot na karon ngadto sa kapin 800 ang binilanggo ang niukopar niini. (/BDB)(BANAT NEWS)