Giilang ‘Bakang’ sa Tangke nasikop sa buy-bust
CEBU, Philippines — Giila sa angga nga “Bakang” nga namaligya og ginadiling drugas ang nadakpan sa kapolisan sa Dakbayan sa Talisay sa may Sitio Magay, Barangay Tangke niadtong Sabado sa gabii. Ang nasikop nailhan nga si Jay-r Gasalatan alyas Bakang, 28, nagpuyo sa maong lugar.
Ang kapolisan nakadawat og impormasyon sa lantaran nga pagpamaligya og ginadiling drugas sa suspek hinungdan nga ilang gihimo ang pakisusi.
Nakuha gikan sa suspek ang 85 ka gagmay nga pakete sa shabu nga balor og P49,560.
Samtang gitanggong sa detention cell sa kapolisan sa Lungsod sa Liloan ang duha ka pusher og shabu nga nadakpan sa managlahing buy-bust operation.
Si Police Chief Inspector Jose Angelo Acupinpin, hepe sa Liloan Police Station, niila sa nadakpan nga si Junrey Sapio Udtohan, 34, taga Jubay ug Norvin Ibale, 34, taga Calero sa maong lungsod.
Si Udtohan nakuhaan og tulo ka gagmay nga pakete sa shabu ug usa ka dakung putos nga ang tanan motimbang og 5.06 gramos. Si Ibale nakuhaan og unom ka gagmay nga pakete sa shabu ug P300 nga buy-bust money.
Sa laing bahin 10 ka motorista nga nakuhaan og shabu sa checkpoint sa kapolisan sa Presinto 1 sa Mandaue City Police Office (MCPO).
Ang kapolisan nga gipangulohan ni Chief Inspector Aldren Villacampa ang nagpahigayon og checkpoint sa dalan Soriano sa Barangay Centro nga nagsugod sa alas 10 sa niaging Sabado sa gabii.
Nadakpan ang 11 ka motorista nga naglakip sa usa ka babaye nga ilang nakuhaan og gagmay nga pakete sa shabu ug mga drug paraphernalia. (BANAT NEWS)
- Latest
