Pesquera moatbang kang Abellanosa

CEBU, Philippines — Nipadayag sa iyang tinguha nga magpapili sa pagka-kongresista sa Cebu City South District si Konsehal Jocelyn Pesquera sa Barug Team Rama-Partido Demokratiko Pilipino-Lakas ng Bayan sa eleksiyon sunod tuig.

Kini nagkanayon nga niumol siya sa maong desisyon human nakita nga nagkinahanglan ang mga residente sa distrito og tingug nga maoy makapadayag sa ilang mga yangungo sa Kongreso.

Matud ni Pesquera nga ang iyang kasinatian sa konseho igo na kaayo nga magamit niya sa Kongreso.

Gituki na sa partido ang maong plano sa konsehal apan iyang giklaro nga walay dakung politiko nga nagtukmod kaniya sa pagpapili sa maong posisyon sanglit iya lang kining kagustohan ang pagpalapad sa iyang serbisyo.

Tinguha sab niya nga makaapil sa diskusyon sa Kongreso nga makapalambo sa iyang kaalam may labot sa panggobiyerno.

Sa iyang bahin, si kanhi mayor Michael Rama, ang pangulo sa Barug Team Rama, nitahud sa desisyon ni Pesquera.

“Yes, she is being considered. If she had made that statement and pronouncement with you, which is considered as verbal expression of her intention. She has been a very loyal, committed and hardworking councilor and as a consultant," matud ni Rama.

Si Pesquera wala mahulga sa iyang atbangan nga si Kongresista Rodrigo “Bebot” Abellanosa bisan sa ka daghan sa resources niini sanglit nisalig siya sa intelligence sa mga botante.

Gihangop ni Abellanosa ang tinguha ni Pesquera nga moatbang kaniya. (/GMR)(BANATNEWS)