DOH-7 nahutdan og supply sa anti-rabies vaccine
CEBU, Philippines – Ang Department of Health (DOH)-7 niangkon nga sa pagkakaron wala pa silay supply sa anti-rabies vaccine human ang ilang supplier adunay kakulian nga nasugatan.
Si Dr. Ronald Jorvick Buscato, Medical IV nibutyag nga sa pagkakaron zero sila sa supply sa ARV human ang ilahang mga supply gipang-apod-apod nila ngadto sa mga animal bite center nga iya sa DOH.
Adunay pipila ka mga animal bite center ang nipadangat na usab sa ilang pahibalo nga wala na silay mga supply sa bakuna apan wala silay mahatag kay wala na man usab silay supply sa rehiyon.
Matud ni Buscato nga gipaabot nila ang supply sa ARV gikan sa ilahang ulohang buhatan karong tuiga apan dili pa nila matumbok kong pila kabuok ang maabot.
Base sa talaan sa DOH-7 adunay 25 mil ka kaso sa napaakan og hayop 20 niini positibo sa rabies diin kasagaran sa mga nakapaak mao ang iro ug iring nga libudsuroy.
Subay sa selebrasyon sa World Rabies Day karong Septiyembre 28 awhag ni Buscato sa mga nanagbuhi og mananap nga mahimong responsable ug dili na lang magpaalig-alig og buhi kong wala man gani kini panahon nga mahatag sa pag-atiman sa mga mananap.
Mapasalamaton usab si Buscato sa tanang LGU kinsa abtik nga nangita usab og mga pamaagi aron makabaton og supply sa ARV bisan og wala sila niini karon sa DOH-7. (/BDB)(BANAT NEWS)
- Latest
