Biyahe sa Lite Ferry sa Argao ug Bohol normal na
CEBU, Philippines — Hingpit nang gibalik kagahapon sa buntag ang biyahe gikan sa Lungsod sa Argao padulong sa Tagbilaran City ug Tagbilaran City padulong sa Lungsod sa Argao human nasunog niadtong Domingo sa buntag ang Lite Ferry 28.
Kini ang gikonpirma sa Coast Guard Station sa Argao kinsa nahinabi sa Banat News.
Matud sa CGS Argao, ang Lite Ferry 28 nga nasunog gihulipan kini sa Lite Ferry 26 nga usa usab ka roll-on and roll-off ship.
Ang Lite Ferry Passenger and Cargo Vessel mao usab ang nag-inusara nga barko nga molawig sa maong lugar.
Samtang ang Cebu Port Authority hingpit usab nga nipahibalo sa pagbalik na sa normal sa biyahe gikan sa Barangay Taloot, Argao padulong sa Tagbilaran City ug vice versa sa Lite Ferry 26.
Unang biyahe kagahapon alas 4:00 sa kaadlawon ug laing biyahe sa alas 12:00 sa udto.
Niadtong Domingo padulong na untang modunggo diha sa pantalan sa Taloot ang Lite Ferry 28 dihang nasunog kini hinuon luwas ang tanang pasahero ug tripulante sa nasunog nga barko. (BANAT NEWS)
- Latest
