DEU gipaubos sa seminar kabahin sa drug operations
CEBU, Philippines — Gipaubos sa seminar sa Cebu City Police Office (CCPO) ang mga personnel sa Drug Enforcement Unit (DEU) gikan sa 11 ka police stations. Tumong niini nga mapalapdan pa ang kahibalo sa mga operatiba kabahin sa ilang operasyon batok sa ilegal nga drugas ug ang pagpasaka og tukmang kaso batok sa nalambigit niini.
Gibana-bana nga 50 ka polis gikan sa mga DEU's sa 11 nga police stations sa CCPO ang niapil sa maong seminar.
Usa sa guests speaker sa maong seminar ang kanhi vice chairman ug undersecretary sa Dangerous Drugs Board (DDB) nga si Atty. Clarence Paul Oaminal.
Si Oaminal nitug-an nga daghan ang drug cases nga gipasaka sa kapolisan batok sa mga nasikop nga drug personalities ang na-dismissed tungod sa sayop nga pagsabot sa giamendahan nga balaod sa Republic Act 9165 o ang Dangerous Drugs Act of 2002.
Si Oaminal nihagit sa CCPO ug Police Regional Office (PRO)-7 sa pag-review sa mga na-dismissed nila nga kaso batok sa drug personalities.
Matud ni Oaminal nga tungod sa na-dismissed nga mga kaso gumikan sa sayop nga pagsabot sa balaod daghang polis ang nasumbalikan og kaso.
Sa laing bahin, si CCPO director, Senior Superintendent Royina Garma niingon nga dako kaayo og tabang ang gihimong seminar sa iyang kapolisan sa DEU. (/BDB)(BANATNEWS)
- Latest
