CCPO nipahigayon og gun safety seminar

CEBU, Philippines – Aron sa paglikay sa ilang mga police personnel sa accidental firing, ang Cebu City Police Office (CCPO) nagpahigayon og gun safety seminar kagahapon.

Ang maong seminar giapilan sa dili mominus 30 ka polis gikan sa 11 ka police stations sa Cebu City. Si Police Chief Inspector Keith Andaya, hepe sa Police Community Relation (PCR) sa CCPO, nagkanayon nga ang maong seminar nagsilbing review o pag-refresh sa matag personnel kabahin sa pagkupot ug paggamit sa giisyu kanila nga armas.

“It’s not sa ingon nga wala ka undergo og gun safety seminar atong mga polis, part man na sa training but to remind, to refresh their knowledge on firearms specially on handling on these firearms,” matud ni Andaya.

Kahinumduman nga usa ka operatiba sa Regional Special Operative Group (RSOG) nga si Senior Police Officer 1 Roderick Balili ang namatay human giingong aksidente nga napusilan ang kaugalingon sulod sa sakyanan samtang gipasa sa kauban niyang polis ang kalibre .9mm niini.

Dugang ni Andaya nga parte sa trabaho sa usa ka polis ang saktong kahibawo niini sa pagdala ug paggamit sa armas aron malikay sa disgrasya.

Hinoon giklaro ni Andaya nga dili kini mao ang una nga gihimo nila nga seminar. (Kenna Kyla G. Calizar/GMR)(BANAT NEWS)