Osmeña dili mokanaog sa katungdanan?

CEBU, Philippines – Walay plano si Toledo City Mayor John Henry Osmeña nga mokanaog sa iyang katungdanan isip mayor sa dakbayan aron nga padayong serbisyohan ang upat ka buwan nga nahabilin sa iyang suspension nga gipahamtang sa Office of the Ombudsman batok kaniya.

“Magpabilin kong mayor ug dili ko manaog pagkamayor bahala nag ila kong alsahon,” matud ni Osmeña sa usa ka video nga gi-post sa group page nga Toledo Political Forum.

Si Osmeña aduna pay nahabiling upat ka buwan gikan sa iyang usa ka tuig nga suspension nga gipahamtang sa Office of the Ombudsman batok kaniya tungod kini sa kasong grave abuse of authority human nga wala gi-release sa mayor ngadto sa Barangay Daanlungsod ang gahin niini sa real property tax.

Apan ang Court of Appeals nipabor kini ug nibali sa desisyon sa Ombudsaman ug giabswelto si Osmeña sa maong kaso. Ang Department of Interior and Local Government (DILG) nipagawas kini og opinion nga nagpabor sa desisyon sa Ombudsman nga ipadayon ang pipila ka buwan nga nahabilin nga suspension batok kang Osmeña.

Si Jerome Gonzales ang provincial director sa DILG nagkanayon nga anaa na ang order gikan sa ilang ulohang buhatan nga nagmando nga ipapadayon gyud sa mayor ang iyang suspension.

“Wala may bag-o nga suspension order, sugo ra man to siya nga ipatiwas tong naputol niya nga gi-serve (nga suspension)”, matud ni Gonzales kinsa nagkanayon nga nakig-coordinate na siya karon didto sa Dakbayan sa Toledo alang sa gikatakda niya nga pag-implementar sa order batok kang Osmeña. (/BDB)(BANAT NEWS)