Siyudad nangita og laing kaabangan og trucks

CEBU, Philippines — Gikatakda nga mohimo og public bidding ang Bids and Awards Committee sa Cebu City alang sa rental sa heavy equipment nga nagkantidad og P47 milyones karong Septiyembre 17.

Sigun sa pangulo sa BAC, Ronald Malacora, nga ang maong kantidad gitagana alang sa buwan sa Septiyembre ngadto na sa Disyembre niining tuiga.

Ang maong budget gikuha gikan sa supplemental budget sa Department of Public Services nga naaprubahan sa Sangguniang Panlungsod niadtong Agosto 14.

Ang mga ekipo langkuban sa 11 ka dump trucks ug 10 ka compactor trucks.

Sigun ni Malacora nga walay kausaban sa terms of reference niini ug ang mga heavy equipment magdagan sulod sa 24-oras. Kinahanglan nga ang modaug sa bidding dunay extra trucks aron hulipan o ayuhon ang mga gubaon na nga mga ekipo.

Gawas niini, ang kontraktor kinahanglan nga maoy moabaga sa fuel consumption o krudo.

Ang papel lang sa kagamhanan sa siyudad mao ang pag-monitor sa operation sa service provider ug ang pagbayad sa service fee.

Matud ni Malacora nga ang Technical Working Group (TWG) mo-review sa gisumetir nga bidding documents sa mga participating bidders.

Kini nagkanayon nga ang mananaug nga bidder kinahanglan mo-comply sa conditions ug motanyag og pinakaubos nga presyo sa rental fee. Dunay gi-assign ang DPS nga supervisors aron mo-track down sa daily operation sa giabangan nga trucks.

Ang maong mga trucks mokolekta sa basura sa kabarangayan ngadto na sa pribadong transfer station.

Sukad niadtong Oktubre 2017 ang siyudad nagsugod sa pag-abang og trucks aron pagpalambo sa inadlaw-adlaw nga pagkolekta sa basura subay sa direktiba ni Mayor Tomas Osmeña.

Sa pagkutlo niining maong balita wala pay interested bidder ang nipakita og intensiyon nga moapil sa public bidding.

Walay ideya si Malacora kon ang Pasajero Motors Corporation moapil ba sa scheduled public bidding.

Ang tag-iya sa Pamocor, Kasambagan Barangay Captain Franklyn Ong, kinsa naglingkod isip ex-officio member sa konseho, niingon nga ang iyang kompaniya dili mo-transact og business sa siyudad ilabi na nga siya na ang presidente sa Association of Barangay Councils (ABC).

Kahinumduman nga ang Pamocor dunay rental contract sa kagamhanan sa siyudad nga nagsugod niadtong Enero ug gilauman nga mahuman karong buwana. (BANAT NEWS)