Basurero, 54, niamong-among og 8-anyos
CEBU, Philippines – Nagtingkagol sa prisohan ang 54-anyos nga basurero human giingong niamong-among sa 8-anyos nga babaye sa may Lawaan 1, Dakbayan sa Talisay.
Ang suspek sutaon pa kung tinuod ang pangangkon sa paryente niini nga adunay kabilinggan sa pangutok.
Matud ni Police Officer 1 Janeth Marquez sa Women and Children’s Protection Desk sa Talisay City Police Station, nga positibo nga adunay gi-turnover sa ilang buhatan nga usa ka menor de edad kinsa base sa pangangkon sa usa ka concern citizen gihilabtan sa maong lalaki.
Dugang pa ni Marquez nga gidawat nila ang maong menor de edad ug gipasusi sa Pink Room sa Vicente Sotto Memorial Medical Center aron masuta ang kahimtang niini samtang ang suspek kasamtangang gitanggong sa kapolisan.
Gitug-an ni Marquez nga nagpaabot sab sila sa pamilya sa matag habig aron ilang maklaro ang pagsang-at og tukmang kaso.
Gibutyag ni Marquez nga mopasaka sila og reklamo batok sa suspek ug ang korte na ang modesider.
Ang suspek sa iyang bahin nitug-an nga nakainom siya sa nilabay nga gabii ug ang bata maoy nihagad kaniya nga maghilawas sila sa kasagbutan.
Namatikdan nga tulibagbag ang tinubagan sa suspek dihang gikahinabi sa Banat News ug susama kini nga wala sa iyang hunahuna. (/GMR)(BANAT NEWS)
- Latest
