Trans-Axial highway gilantaw nga sulbad sa kahuot sa trapiko
CEBU, Philippines — Ang problema sa kahuot sa kadalanan sa Metro Cebu posibleng maibanan kon mapadayon ang Cebu Trans-Axial Development Project sa tungatungang bahin sa Sugbo matud pa ni kanhi Cebu Provincial Board Member ug kasamtangang Capitol Consultant Gigi Sanchez.
Matud ni Sanchez nga ang maong highway nga modagan gikan sa Santander hangtud sa Daanbantayan dili lang makasulbad sa trapiko makatabang usab kini sa paglambo sa mga lungsod nga maagian niini.
Gibutyag ni Sanchez nga ang maong proyekto giduso kaniadto pa sa iyang amahan nga si kanhi Bise Gobernador Gregorio Sanchez.
Ang maong proyekto giplanohan nga sugdan unta niadto pang tuig 2008 ug mahuman unta niadtong 2013.
Ang Trans-Axial highway adunay gitas-on nga 300-kilometro ug upat ka lane nga karsada nga moagi sa tungatunga sa Sugbo gikan sa Santander sa habagatan padulong sa Daanbantayan sa amihanan.
Si Sanchez nagkanayon nga base sa gihimo nga pagtuon nga gi-commission sa provincial government ang maong proyekto makahatag usab og dugang trabaho sa mga Sugbuanon. Mabawi usab ang investment costs tungod sa income unya nga makuha gikan sa turismo ug mga negosyo nga ipamutang sa mga munisipyo ug siyudad nga maagian sa maong karsada.
Ang maong proyekto mogasto kini og P46.31 billion diin ang P1.58 billion niini alang sa pagpalit sa mga luna nga maigo niini nga sagubangon sa provincial government.
Ang balanse nga P44.73 billion alang kini sa site development, facilities construction ug pre-operating expenses. Richel Ann P. Basiga (BANAT NEWS)
- Latest
