Babaye ug barbero gipatay

CEBU, Philippines — Patay ang usa ka negosyanteng babaye ug usa ka barbero  nga gipamusil diha sa tindahan sa sulod sa merkado publiko sa Barangay Poblacion,  Lungsod sa Cordova sa miaging Biyernes sa gabii.

Si Police Officer 3 Vilma Degamo sa Cordova Police Station miila sa biktima nga mao si Analyn Menguito, 37, taga Sitio Calan, Barangay Poblacion ug Gilbert  Bayot,  taga Sitio  Ubos, Barangay Poblacion sa maong lungsod.

Sumala pa sa kapolisan adunay mga alegasyon nga may relasyon ang duha bisan og minyo ang babaye.

Matud pa ni Degamo nga diha sa iyang tindahan ang biktima nga si Menguito ug nalinga kini sa pag-atiman sa iyang kustomer dihang may wala hiilhing lalaki ang kalit nga nipusil sa mga biktima.

Ang ikaduhang biktima nga si Bayot kinsa  diha usab sa  tindahan ni Menguito kay nitabang atol sa  maong hitabo giapil sa pagpusil  apan nakadagan pa kini padung sa parkingan sa traysikol ug nangayo og tabang.

Ang duha parehong nabugtoan sa ilang mga kinabuhi. Dali nga miikyas ang mamumuno ug wala na maabti pa sa mga mirespondeng mga polis.

Padayon pang naghimo og lawom nga imbestigasyon ang kapolisan pagtino sa motibo sa maong krimen.

Si Senior Police Officer 1 Edwin Jeduyo, ang imbestigador sa maong kaso miingon nga ang mga kabanay ni Menguito mitug-an nga adunay mga nakabikil nga laing stall owners ang biktima kaniadto.

Gisusi karon sa kapolisan ang anggulo nga love triangle ug sa negosyo ang motibo sa maong pagpatay.

“Usa pud sa among gitan-aw ang love triangle kay ang mga paryente sa babaye niingon man nga mura man og adunay relasyon ang duha kay kadaghan na nakit-an nga sweet sa usa’g-usa,” matud pang Jeduyo sa phone interview sa The FREEMAN. (Romeo T. Limpangog/IBM)