Pasangil gibasura
CEBU, Philippines – Nakalingkawas si Cebu City Barangay Tejero Kagawad Jessielou Cadungog sa gipasakang reklamo batok kaniya kalabot sa pagpamusil niadtong bulan sa Hulyo kon diin napatay ang usa ka polis nga gidudahang hitman.
Ang provincial prosecutor mibasura sa murder ug frustrated murder nga gipasaka sa Criminal Investigation and Detection Group (CIDG) batok sa kagawad, samtang ang reklamo batok sa iyang drayber nga si William Macaslang, gi-downgrade gikan sa murder ngadto na lang sa homicide ug attempted homicide.
Si Macaslang mao ang miangkong nakapusil patay kang PO3 Eugene Calumba niadtong Hulyo sa dihang giingong suway unta silang banhigan niini. Nadakpan ang drayber ni Calumba nga si Michael Banua.
Matud ni Cecil Gadrinab, administrative officer sa Provincial Prosecutors Office, ang provincial prosecutors office nag-umol kini og panel sa mga piskal pag-imbestigar sa kaso, gipangulohan ni Fiscal Rose Marie Pabatao.
Daan nang miinsister si Cadungog nga wala siya sa sakyanan dihang nahitabo ang pagpamusil apan giapil siya sa gipasanginlan.
Gitawgan sa Banat News ang abogado ni Cadungog nga si Atty. Renato Galleon apan wala kini motubag sa mga tawag ug text.
Ang kasong homicide kang Macaslang adto dunggon sa RTC Branch 17 samtang ang attempted homicide didto sa MTCC.
Si Atty. Benjamin Militar ang abogado ni Macaslang nagkanayon nga nakapiyansa na sila sa kasong homicide ug karong Lunes lihokon ang piyansa sa attempted homicide.
Matud ni Militar walay “elements of murder” sa kaso ni Macaslang. Wala usab pabori ang pamahayag ni Banua nga testigo sa CIDG-7. (/IBM)(BANAT NEWS)
- Latest
