Polis magtaptap atol sa checkpoint gireklamo

CEBU, Philippines – Mga residente sa Barangay Tanke, Dakbayan sa Talisay nireklamo sa kapolisan nga mag-checkpoint o mag-roving diha sa ilang lugar tungod kay ilang naobserbahan nga magtaptap sa nawong ang uban niini.

Si Superintendent Marlu Conag, hepe sa kapolisan sa siyudad nagkanayon nga iyang ipatawag ang iyang mga personnel lakip na ang mga sakop sa Regional Mobile Force Battalion (RMFB) aron iyang pahinumduman kabahin sa pagpahigayon og checkpoint.

Gipasabot ni Conag nga ang mga bantayanan atol sa checkpoint mao nga ang lugar diin gipahigayon ang checkpoint dili ngitngit ug gidumala sa unipormadong otoridad.

Bisan kinsa nga  moagi og checkpoint kinahanglang mopahinay sa pagpadagan ug pasigaon ang suga sa sakyanan, dili usab kinahanglan nga mokanaog sa sakyanan, visual search lang ang mahimo sa polis nga mag-checkpoint ug dili usab motugot sa physical o body search, motubag sa pangutana sa polis ug uban pa. Si Conag nagtuo nga ang nakit-an sa mga nireklamo posible nga mga sakop sa auxiliary o ba kaha barangay tanod.

Dugang ni Conag nga nitabang lang kanila ang mga auxiliary ug dili sila makapugong sa pagtaptap sa mga nawong niini tungod kay magsilbi usab kini nilang proteksiyon nga dili mailhan sa mga ilegalista. (/BDB)(BANAT NEWS)