JVA tali sa Cebu City ug UHRI gibabagan

CEBU, Philippines – Si Busay Barangay Councilor Amilo Lopez sa Barug Team Rama niadtong adlaw’ng Martes nihangyo sa Regional Trial Court (RTC) nga moisyu og Temporary Restraining Order and/or Writ of Preliminary Injunction aron pugngan ang kagamhanan sa Siyudad sa Sugbo nga mosulod sa Joint Venture Agreement tali sa Universal Hotels and Resorts, Inc.

Ang city government gikatakdang mopirma og JVA sa UHRI alang sa P18 billion integrated resort and casino nga tukuron diha sa Kawit Island sa South Road Properties (SRP) karong adlaw’ng Biyernes, alas 5:00 sa hapon sa Crowne Plaza Galleria, Ortigas.

Tulo ka cause of action ang gitumbok ni Lopez una nga ang UHRI walay financial capacity mo-undertake sa proyekto subay na sa Joint Venture Ordinance; ang UHRI walay financial capacity nga mo-undertake sa project prescribe ubos sa susamang ordinance ug ang city council wala nihatag og pagtugot kang Cebu City Mayor Tomas Osmeña nga mopirma sa JVA tali sa kadagkuan sa UHRI.

Ang siyudad giingong dili angay mosulod sa JVA nga giingong “grossly disadvantageous” dungan sa pagbutyag ang siyudad ug UHRI giingong napakyas sa pag-comply sa provision sa Ordinance No. 2156 nga may labot sa joint venture tali sa private sector ug city government.

Si Osmeña sa iyang bahin, nihulagway nga usa ka harassment ang gibuhat ni Lopez ug ang mga abogado na niini ang motubag sa maong petisyon.

Si Osmeña nipasangil nga nahadlok ang Barug Team Rama nga mapildi sa sunod nga eleksiyon sanglit ang maong proyekto maghatag og 5,000 ka trabaho sa mga Sugbuanon hinungdan nga ilaha kining gibabagan. (/BDB)(BANAT NEWS)