Piskal ni-inhibit sa kaso ni Cadungog
CEBU, Philippines — Nibuhi ang Cebu City Prosecutor’s Office sa kaso nga naglambigit sa barangay konsehal sa Tejero nga si Jessielou Cadungog ug sa drayber niini.
Kini human ang Criminal Investigation and Detection Group (CIDG-7) niduso og motion sa pagpa-inhibit sa piskaliya sa maong kaso.
Matud ni Atty. Inocencio dela Cerna, consultant sa CIDG-7, nga nihangyo ang kampo sa kapolisan nga mo-inhibit ang Cebu City Prosecutor aron pagseguro nga patas ang pagdungog sa kaso. “Lisud man ni kay kahibalo man ta nga it is the Cebu City Prosecutor’s Office and the Mayor is also very influential in the city,” matud ni dela Cerna.
Ang Cebu City Prosecutor una kining niumol og 3-man panel sa mga piskal sa pag-imbestigar sa kaso ni Cadungog ug sa drayber niini nga si William Macaslang.
Ang National Bureau of Investigation (NBI-7) unang nipasaka og kasong homicide batok ni Macaslang kinsa maoy nakapusil patay kang PO3 Eugene Calumba kinsa giingong suway unta nga mobanhig nila ni Cadungog sa may T. Padilla Extension, Dakbayan sa Sugbo.
Ang CIDG-7 nisunod sab pagpasaka og kasong murder ug frustrated murder batok ni Cadungog ug Macaslang.
Ang kampo ni Cadungog niduso na sa ilang counter-affidavit sa kaso nga gipasaka sa CIDG-7 niadtong Lunes diin gisaysay nga wala ang konsehal atol sa hitabo.
Si Regional State Prosecutor Fernando Gubalane nipagawas og kamanduan nga ibalhin ang mga kaso ngadto sa Assistant Provincial Prosecutor alang sa imbestigasyon niadtong Agosto 10. (BANAT NEWS)
- Latest
