Laaw Lagoon gipaubos sa rehabilitasyon

CEBU, Philippines — Temporaryong gipasirad-an sa lokal nga kagamhanan sa Lungsod sa Sta. Fe ang lagoon sa Barangay Hagdan, Isla sa Kinatarcan alang sa himuong rehabilitasyon sa maong tourist spot.

Ang Laaw Lagoon anaa kini nahimutang sa luna nga gipanag-iya sa Probinsiya sa Sugbo sa maong isla nga plano sa Kapitolyo i-develop.

Si Joselito “Boboi” Costas, pangulo sa Provincial Tourism Office nagkanayon nga bisan pa man og wala pa ma-develop pag-ayo ang maong tourist destination daghan na ang nibisita niini diin diha sa maong lugar mamahimong makakuha og presko nga lato.

Ang lokal nga kagamhanan sa Sta. Fe nipagawas og kamanduan nga temporaryo una nga siradohan ang maong lagoon sulod sa upat ka bulan sukad niadtong Hulyo 1 karong tuiga.

Giingong ang maong lugar gikatakdang butangan og viewing deck nga tawagon nga “Tamboan ni Leon”.

Ang mga residente gikan sa tulo ka barangay sa nahisgutang isla nga gilangkuban sa Hagdan, Kinatarcan ug Langub ang gilambigit sa duha ka workshop nga gilangkuban sa eco-tourism management planning ug business planning.

Tumong niini nga matudloan ang mga residente sa paghimo og negosyo ug mapabilin nga mapanalipdan ang kalikupan taliwala sa pagpalambo sa turismo sa lugar. (BANAT NEWS)