P1.6M CCTVs ibutang sa CPDRC
CEBU, Philippines — Usa ka bag-ong security camera system nga mobalor og P1.6 milyones ang gitakdang itaod sa Cebu Provincial Detention and Rehabilitation Center (CPDRC) aron mas ma-monitor pa ang ang mga inmates sa sulod.
Ang maong sistema naglakip og usa ka high definition nga CCTV system nga adunay gitawag nga wireless infrastructure.
“The said system is pivotal in the move to fully equip the CPDRC with the required devices that may help in the operations of the Center most especially in the aspect of monitoring,” nakapatik sa resolusyon.
Niadtong Miyerkules, gitugotan sa Hunta Probinsyal ang gobernador nga mopirma og kontrata uban ang MM & S Enterprises. Ang maong bidder mao ang ni-offer og labing ubos nga presyo nga P1,632,305. Kini ubos og hapit P300,000 kon ikompara sa approved contract budget nga P1,957,000.
Si PB Member Sun Shimura, ang nag-sponsor sa maong resolusyon, miingon nga angay nga mas hugtan pa ang pag-monitor sulod sa maong prisohan ilabina kay congested na kaayo kini ug aduna pa gihapoy makuha nga mga kontrabando gikan sa mga inmates.
“There’s also a need gyud for monitoring kay kana man gud nga tawo, corruptible man gud. So, patabang ta aning atong mga technologies karon,” sigon niya.
Si Shimura ang kasamtangang chairman sa provincial level Committee on Public Safety, Peace, and Order.
Niadtong Agosto 2017, miingon si Bobby Legaspi, ang kanhi Officer-in-Charge sa CPDRC, nga adunay gibana-bana 30 ka CCTV cameras ang na-install na daan sa sulod.
Midugang siya nga mas maayo nga ibutang sa taas nga dapit ang mga bag-ong camera para mas lapad ug makita. (BANAT NEWS)
- Latest
