Giilang tulisan gipatay

CEBU, Philippines — Wala na makamata gikan sa pagkatulog ang usa ka gipasanginlang notadong tulisan dihang kini gipusil sa wala mailhing mamumuno samtang siya natulog didto sa Sitio Mananga 1, Barangay Tabunok, Dakbayan sa Talisay niadtong Sabado sa gabii.

Ang napusilan nailhan lang sa pangalan nga alyas Jumong nga giingong maoy responsable sa mga pagpanulis diha sa maong barangay.

Si SPO1 Achilles Cabando sa Talisay City Police Station nibutyag nga gisaka sa wa ilhing tawo ang biktima ug gipusil makadaghang higayon.

Gisuwayan sa pagtabang ang biktima apan nakabsan gyud kini sa iyang kinabuhi.

Ang mga nirespondeng polis nakakuha og unom ka kabhang sa .45 nga bala, mga drug paraphernalia ug usa ka .357 nga revolver nga adunay lima ka bala.

Si Cabando niingon nga posibleng daghan na ang naglagot sa biktima ug kini gipanimaslan.

Padayon pa hinuon ang otoridad sa pag follow-up sa maong kaso. (BANAT NEWS)