Polis nga gidudahan namatay

CEBU, Philippines — Duha ka adlaw human sa giingong pagkabiktima ni Senior Police Officer 1 Roderick Balili sa ‘accidental firing’ sa iya rang kaubang polis atol sa paghimo og surveillance sa usa ka high value target didto sa Lungsod sa Pinamungajan nakabsan kini sa kinabuhi sa usa ka hospital sa Cebu City.

Ang tigpamaba sa Police Regional Office (PRO) – 7 nga si Superintendent Reyman Tolentin miingon nga base sa ilang nadawat nga taho pasado alas 8 sa gabii niadtong Biyernes nitaliwan si Balili human kini nakaangkon og duha ka samad sa dughan.

Niadtong Biyernes sa buntag atol sa gipahigayon nga press conference sa PRO-7 gipangulohan sa direktor nga si Chief Superintendent Debold Sinas, kini mitug-an nga ‘stable’ na ang kahimtang ni Balili.

“Initially siguro, nabuhi siya wala lang ka-survived ang iyang lawas sa igo sa bala. Wala pa mi kabasa sa medical report,” sigun ni Tolentin.

Si Balili maoy gidudahan nga maoy ni-ambush patay sa usa ka Philippine Drug Enforcement Agency (PDEA) agent nga si Von Rian Tecson niadtong Miyerkules sa udto apan gihimakak kini sa PRO-7 ug matod pa nagsunod lang ang maong panghitabo apan walay koneksiyon.

Sumala pa sa naunang report, nga si Balili kuyog ang laing duha ka polis sa Regional Special Operations Group (RSOG) naghimo og surveillance didto sa Pinamungajan sa usa ka giilang Baselio Nilo Quirante nga usa kanhi ka polis apan naunay kini sa iyang service firearm nga gidunol sa iyang kauban sulod sa sakyanan human sila nakaagi og libaong sa kalsada.

“Naa man guy mga pusil nga butangan og piyesa ilabi na ang Gloc puwede na butangan  piyesa nga mamahimo siyang automatic so. Automatic kung nibuto siya parang ang iya buto masunod-sunod. Naa siyay lock (9mm  Gloc), but naa sa trigger gamay lang kaayo ang kuan niya so kung naka-chamber load ka kung mahulog na siya or kung mapukpok puwede na siya accidentally mobuto,” pasabot ni Tolentin.

Si Tolentin midugang usab nga ang driver ni Tecson nga si Arnulfo Bauyaban mitug-an sa kapulisan nga layo sa dagway ni Balili ang gunman sanglit muboon nga tawo ang iyang nakit-an.

Si Police Chief Inspector Alfredo Kuhay, hepe sa Pinamungajan Police hinuon miklaro nga wala silay na-record sa ilang blotter kabahin sa accidental firing nga insidente sa ilang lugar,apan matod niya aduna siyay nadawat nga tawag gikan sa usa ka concerned citizen mahitungod sa nadunggan nga buto-buto sulod sa usa ka sakyanan pasado alas-11 niadtong Miyerkules tukma sa oras nga giingong na-accidental firing si Balili.

“Naay nitawag nako sa akong personal number apan wala na mohatag pa og laing detalye. Nagpaabot mi nga motawag balik apan wala. Daghan man sad gud usahay og mga false alarm ‘ta nga madawat,” si Kuhay miingon.

Ang duha ka kauban nga polis ni Balili gipaubos na karon sa imbestigasyon matud ni Tolentin ug hayan pasakaan og kasong administratiba, apan wala siya motug-an sa ilang mga pangalan.

Si Tolentin midugang nga tun-an pa sa kadagkuan sa PRO-7 kung tagaan ba og police honors atol sa iyang lubong si Balili.

Iya usab giklaro nga walay derogatory records si Balili isip polis, gani daghan kini og mga nadawat nga mga awards nga dili mominos siyam ka Medalya ng Kagalingan ug Medalya ng Kasanayan. Si Balili nisulod sa pagkapolis niadtong 2004. (/IBM)(BANATNEWS)