Trabahante ubos sa TUPAD naswelduhan na

CEBU, Philippines – Nakadawat og kapin P10 milyones ang kapin sa 1,000 ka underemployed nga trabahante gikan sa 28 ka barangay sa Siyudad sa Sugbo.

Kini isip ilang sweldo ubos sa programa sa Department of Labor and Employment (DOLE) nga Tulong Panghanapbuhay sa Ating Disadvantaged Workers (TUPAD).

Matud ni Atty. Alvin M. Villamor, regional director sa DOLE-7, nga ang TUPAD usa ka programa sa ahensiya nga maghatag og transitional nga trabaho sa mga kwalipikado nga mga benepisyaryo sulod sa pila lang ka adlaw.

“Beneficiaries worked for fifteen days in various identified social, economic and agro-forestry community activities in several areas covered,” matud ni Villamor kinsa nidugang nga ang mga trabahante nakadawat og sibo sa minimum wage rates sa Siyudad sa Sugbo.

Ang pagbayad sa sweldo gipahigayon sa Barangay Guadalupe alang sa mga trabahante gikan sa Labangon, Pamutan, Pung-ol, Sibugay; Sudlon, Pahina Central, San Nicholas; Sapangdaku, Bonbon, Tabunan, Sudlon 2, To-ong, Tagba-o, Babag, Buot, Buhisan, Poblacion Pardo, Pasil, Inayawan, Guadalupe, Sawang Calero, Duljo-Fatima, Cogon, Pardo; Basak, San Nicholas; Calamba, Bulacao, Quiot, Punta Princesa, ug Suba.

Sumala  sa Tri-City Field Office (DOLE-TCFO) Chief LEO, Emmanuel Y. Ferrer, nga matag benepisyaryo nakadawat og P5,490 ug insurance coverage ubos sa Government Service Insurance System (GSIS) ingon man personal protective equipment (PPEs). Ang TUPAD usa sa duha ka bahin sa DOLE Integrated Livelihood and Emergency Employment Program. (/GMR)(BANAT NEWS)