DENR-7 nakadawat og electric vehicle

CEBU, Philippines — Usa ka unit sa electric vehicle ug quick charging station ang pormal nga gi-turnover sa Mitsubishi Motors Philippine Corporation sa buhatan sa Department of Environment and Natural Resources (DENR)-7.

Matud ni DENR-7 Regional Director Gilbert Gonzales, ang i-MiEV electric vehicle nga ilang nadawat kabahin kini sa donasyon sa MMPC ngadto sa DENR niadtong Hunyo, 2017 diin ang ubang unit anaa sa ilang ulohan nga buhatan.

Ang donasyon sa maong produkto kabahin sa gilagdaan nga memorandum of understanding (MOU) tali sa DENR ug MMPC alang sa hiniusang paghimo ug pagtuon sa pagpamenos sa carbon emission ug pagpalig-on sa pagtambayayongay sa pag-promote sa clean energy and environmental protection and conservation sa nasud.

Matud ni Gonzales nga bulahan sila sa DENR-7 kauban ang Davao Region tungod kay usa sila sa napilian nga modawat sa electric vehicles ug charging stations kay ilaha kining gamiton alang sa ilang adlaw-adlaw nga operations kalabutan sa ilang tinguha pagkonbinser sa ubang national nga ahensiya ug private partners nga mo-invest sa clean technology nga makaubos sa carbon emissions ngadto sa kalikupan gikan sa transportation sector.

Base sa datos sa Environment Management Bureau (EMB)-7 usa sa mga dakong factor sa air pollution sa Central Visayas tungod sa nagsaka nga gidaghanon sa motor vehicles hinungdan nga mapasalamaton si Gonzales sa MMPC sa suporta nga gihatag niini.

Ang turnover gisalmotan sa mga kadagkoan sa DENR-7 ug MMPC President and CEO Mutsuhiro Oshikiri. (BANAT NEWS)