Nisuborno sa polis sa checkpoint gidakop

CEBU, Philippines — Wala gyud mahaylo ang kapolisan sa Dakbayan sa Talisay sa suborno sa ilang nasita sa checkpoint sa Barangay Tangke alas 11:30 sa buntag kagahapon.

Gidakop hinoon nila si Christopher Cabrera, 40, taga Dawis, San Roque sa maong siyudad, kinsa giingong walay lisensiya ug walay helmet nga nagmaneho sa motorsiklo.

Matud ni PO2 Arthur Abediana nga hayan naguol si Cabrera nga matanggong ang iyang motorsiklo maong nikuot kini sa iyang bulsa ug nitunol og P220 ngadto sa polis bugti sa iyang pagsibat.

Asoy pa ni Abediana nga magsilbing leksyon kini sa uban ang nahitabo ni Cabrera kinsa pasakaan og kaso. (BANAT NEWS)